معادلة جبريّة..سيد حجاب

الموت طرف

وعيشة القرف طرف

ولمّا تصبح الحقيقة عار
والكذب ع النفوس شعار

بتصبح البيوت..

قبور بلا صبّار

ويصبح السكوت ترف

ساعتها يبقى الموت...

طريقنا للشرف!

"أنا بحبّك"!

كان فيه بوست تاني ناوي أنزّله النهاردة، بس جه فبالي سؤال وأنا قاعد مع هاني صاحبي من شوية ع النيل، وكانت إجابة هاني ع السؤال محبطة جداً ليّ، فقلت اسأله هنا يمكن ألاقي إجابة مشجّعة شوية.

ايه اللّي يحصل لو في المظاهرات اللّي ضد مبارك أخدنا معانا ورد أحمر ووزعناه على عساكر الأمن المركزي؟!

ولو ما رضيوش ياخدوه نحطّه قدامهم ع الأرض، ونشم الورد الأول عشان يطمّنوا إن الورد مفيهوش حاجة.

هاني قعد يضحك وقال لي العساكر هتقول عليكم gays-مثليين يعني-!

قلتله بتكلم بجد، قال لي وأنا والله بتكلم بجد!

قلتله إنه متأثّر بفيلم عمارة يعقوبيان، لكن ما أعتقدش العساكر هتبقى متأثّرة به، بعدين مش معقولة كلنا gays يعني، دا غير إن عادةً بيبقى فيه بنات في المظاهرات دي، فموضوع الـ gays دا مش هيبقى وارد!

قال لي هيضربوكم برضو!
قلتله مش مشكلة، يضربونا عادي..والمرة اللّي بعدها نديهم ورد برضو!
قال لي هيفضلوا يضربوكم على طول، ومفيش حاجة هتتغيّر.

أنا مش مقتنع بكلام هاني، وشايف إن مع استمرار الحركة بتاعة الورد دي لفترة، العساكر هتفهم الرسالة اللّي بحاول أوصلهالهم، " أنا بحبّك"، بعدين المفروض يتم تدعيم الحركة دي بهتافات مع العساكر، وممكن رسومات كمان تتحط على يفط كبيرة.

...

على الهامش: البلوج دا جميل قوي، بينشر أحدث المقالات المتميّزة، فبيوفّر على الواحد جهد كبير جداً.

..

أنا مش تبع مخلوق يا سيدنا البيه

أنا حر في اللّي يقول ضميري عليه
وإن كنت تُحكم جُوّا مَلَكوتك

الشارع الواسع فاتح لي ايديه!

صلاح جاهين

تاج

الكمبيوتر اتصلّح الحمد لله، فقلت أرد على التاج دا الأول، التاج جالي من عمرو عبد الصمد

..

هواياتي
والله دلوقتي ما بمارسش أي هواية خالص غير القراية، مافيش وقت ومافيش نفس.

عيوبي

عصبي جداً، دماغي ناشفة، بفقد حماسي بسرعة، بشيل جوايا وصعب أنسى الإساءات.

حاجات بكرهها جداً
هممم، لو قعدت أعد مش هخلص، بس ممكن أقول التمسّك بالعادات والتقاليد المتخلفة، الخضوع وعدم الثورة (الثورة بشكل عام، ما أقصدش ثورة ضد نظام سياسي بالتحديد)، التظاهر والادّعاء والنفاق.

حاجات بحبها قوي ومش بمل من تكرارها
أنا ملول جداً بطبعي فعادي إني أزهق من أي حاجة، بس ممكن أقول معظم أفلام آلبتشينو، ومعظم أفلام عاطف الطيب، وشعر نجيب سرور، ومعظم أعداد سلسلة سافاري بتاعة أحمد خالد توفيق.

سؤال بيستفزني

أنت سايب دقنك ليه؟

حاجات مؤمن بيها جداً
مش فاهم السؤال دا بالظبط، كوتس مثلاً؟ طيب لو كدا فيه عبارتين، الأولى لجيفارا وبتقول:
It's a sad thing not to have friends, but it's even sadder not to have enemies

والتانية لسارتر وبتقول:

Hell is other people

أكتر حاجة فاشل فيها
فاشل إني أحقق السعادة لنفسي!

وظيفة بحبها
أنا ما بحبش الشغل بشكل عام، ولو جمّعت فلوس تكفّيني لحد ما أموت مش هشتغل أصلاً

بس ممكن أقول راعي غنم، أو صيّاد، أو فلّاح ( من غير ترتيب)

مثلي الاعلي في الحياة

ماليش!

أنا ضد فكرة المثل الأعلى أصلاً، لأنك بتحط حاجة قدامك وبتحاول توصل لها..طيب أولاً لو المثل الأعلى دا ارتكب خطأ معيّن هل يبقى من حقي أرتكب نفس الخطأ دا؟
دا غير إنك بتحط المثل دا كإنه الكمال اللّي بتحاول الوصول إليه، ليه بتحط سقف لنفسك؟
ما تحط الكمال نفسه وتحاول توصل إليه!

يعني أسيب الصدق مثلاً وأتخذ واحد صادق مثل أعلى في الصدق؟

طيب ما أنت قدامك المعنى المجرد!

للأمانة فيه نقطة سقّطتها عشان مش عاوز أجاوب عليها (أمنيتي في الحياة)، وبمرر التاج لأمادو ، ومؤنس فرحان

لو التاج ما يضايقهمش

لمحات (3)

ضمّت وليدها إلى صدرها في حنان، طبعت قبلة حانية على جبينه، وشرعت تطعمه الشوكولاتة التي يحبها...
توقفت فجأة قبل أن يكمل الشوكولاتة، وبلا سبب واضح...استلّت خنجراً من حقيبة يدها..قطعت ساقيه، وتركته ينزف ومضت...!
..

يسعل بشدة بعد استيقاظه، لتختلط آلام صدره بآلام ظهره وآلام أسنانه، يعد نفسه أن يكتفي بعُلبتي سجائر يومياً، يعد نفسه أن يذهب لطبيبي العظام والأسنان، يعد نفسه أن يجري نصف ساعة يومياً ليرفع من لياقته البدنية...وفي صباح اليوم التالي تتكرر نفس التفاصيل ونفس الوعود!
..
-ايه رأيك في ألبوم منير الجديد؟

- كويّس

-كويّس!!..كويّس بس؟!..دا رهيب يا ابني!

(بهدوء وابتسامة صغيرة بركن الفم الأيسر)-ما بقاش فيه حاجة رهيبة!

..

منذ أكثر من عشرة سنوات وهو يحلم بزيارة باريس، لكنه في الشهرين الماضيين وجد تفضيلاً غريباً في نَفْسه لزيارة لندن...

هل هناك علاقة بين هذا الأمر و بين لقبي المدينتين؟..ربّما، وربّما حتّى أحلام طفولته قررّت التخلّي عنه!

(باريس=مدينة النور، لندن = مدينة الضباب)

..

الهيروين لا يحنث بوعوده، يعدك بشيئين..أن يمنحك في المرة الأولى سعادة لا تُوصف؛ ستحلّق، تحقق أحلامك، وترى العالم كما أردته دوماً...

أما وعده الثاني فتحطيمك بعد ذلك!
من البديهي إذن أن تتنازل عن تلك السعادة الزائلة، لكن لو كنت مُحطّم بالفعل..فهي صفقة عادلة!

يونيو 2008

...

لا نقدر تحتَ سياط القهر
أن نلقي النظرةَ خلفَ الظهر!

من "أيدوم النهر؟" لأمل دنقل

قد آن للقلب الجريح أن يستريح

1 يونيو..ذكرى ميلاد نجيب سرور الله يرحمه..أتمنّى يكون نجيب استريّح فموته...

قد آن ياكيخوت للقلب الجريح

أن يستريح ،

فاحفر هنا قبراً ونم

وانقش على الصخر الأصم :

" يا نابشا قبرى حنانك ، ها هنا قلبٌ ينام ،

لا فرق من عامٍ ينامُ وألف عام ،

هذى العظام حصاد أيامى فرفقاً بالعظام.

(لزوم ما يلزم..نجيب سرور)
..

-لو ينفع تقول حاجة لنجيب هتقول له ايه؟
-هقول له إنّي بحبّه قوي، وهقول له معلش..وأطبطب عليه وأحضنه!

يمكن يكون فيه شعراء أبرع من نجيب..لكن شعر نجيب الأقرب لقلبي، شعره أكتر شعر بيخلّي جسمي يقشعر ويترعش، وأكتر شعر بيبكّيني
وأكتر شعر بيخلّيني أسرح، وأكتر شعر بيخليني أبقى مش دريان بالدنيا من حواليّ.
نجيب هوّ الشاعر الوحيد اللّي فعلاً حبّيته..حبّيته كشخص وأتمنيت أقابله رغم إني ما أعرفش عنه كتير.

نجيب سرور عاقل رغم أنوفكم ... د. مفيد مسوح

نجيب سرور..مأساة العقل...د. أبو بكر يوسف

تحت عباءة أبي العلاء نجيب سرور..حازم خيري

موقع نجيب سرور اللّي شهدي ابنه عمله

بالنسبة لتاني وتالت لينك..هيحتاجوا تظبيط للغة الصفحة
من فوق على الشمال
View
بعدين Encoding
بعدين Arabic Windows

الصفحة بتاعة نجيب فيها قصيدة " الـ ** أميات"..القصيدة فيها قباحة عالية لكن في نفس الوقت عبقرية
حبّيت أنوّه بس عشان لو الألفاظ دي بتسبب أذى لحد ما يدخلش الصفحة بتاعتها..لكن يقدر يدخل الموقع بتاع نجيب وما يدخلش صفحة الأميات.

لمّا عبد العزيز مخيون سأل نجيب قبل كدا على القصيدة دي نجيب رد وقال إن في عصور الانحطاط والهزائم بيبقى دا شكل الشعر!
اللّي هيقول دي قلة أدب بقى والليلة دي يفكّر الأول لو كان له روح نجيب ومر باللّي مر به نجيب كان هيكتب ايه؟
زي ما أبو العلاء قال:
"لا تظلموا الموتى وإن طال المدى..إني أخاف عليكم أن تلتقوا!"
..
ما حطّيتش لينك الويكي لأن فيه مغالطات وفيه كلام مكتوب بحيادية شوّهت الحقيقة للأسف
كنت أتمنّى أكتب عن نجيب لكن نفسياً مش قادر أكتب..التعليقات مقفولة عشان مش هسمح بأي كلمة وحشة عن نجيب في مدونتي.