لمحات (1)

جلست مع أصدقائي على أحد المقاهي ندخّن سيجار كوبي يدوي الصـنـع ( hand made )شردت قليلاً.. فجالت بخاطري نظريّة السيجار الكوبي...

طفل شريد وقف تحت الأمطار -أو ربما تحت حرارة الشمس-ليجمع أوراق التوباكو و يصنع هذا السيجار..ليدخّنه شاب مرفّه مثلي و هو يتشرّد في الشوارع !

***

واقفة تحادثه و تنظر إليه في حب..تمنّت في نفسها أن يقبّلها..فلمّا قبّلها صفعته..لأنه "عيب و حرام" !!

***

ظل يلعن الحياة طوال عمره و يدعوا الله دعوة واحدة...أن يموت!

فلمّا مات ندم على دعوته..و تمنى لو عاد للحياة فدعا الله أن يرحمه!!

***

قالت : قالوا أنك غريب الأطوار..قالوا فيلسوف..ربما مجنون كذلك!

فقال : كذبوا..!!..فقط مازلت أحتفظ بآدميّتي!

حوار

دا حوار دار بيني و بين حامد إبراهيم ع الماسنجر..و حسيت إنه يستحق أنشره فاستأذنت حامد و ادي الحوار..

--
حامد: http://www.imbh.net/cms/news.php?newsid=fmbh61123133669

حامد: قريت اللي قاله في التكريم؟

عمرو: اه

حامد: الواحد كان هايعيط وهو بيقرا لأنه تخيل موقفه الشجاع وإن الواحد لو فضل نضيف ممكن يتحط في حاجات زي دي مش شرط جوايز بس في مواقف في كل الحياة

عمرو: مش فاكر مين كان قال إن الناس لما بتكبر بتتعلم النفاق و المداهنة والوساخة..و لو ما اتعلمتش دا هتبقى فيلسوف أو مجنون!

حامد: كانت فيه واحدة في مدونة مش عارف قلتلك عليها ولا لأ،بتقول إنك دلوقتي مبادئك بنسبة 90% مثلا..بعد 5 سنين هتلاقيك بنسبة 80..ممكن آخر العمر تلاقي اللي فضل 30،كده كده هاتضطر للتنازل و برغم عدم موافقتي معاها بس ممكن فعلا الواحد يرضخ ! ده احتمال ما ينفعش ننكره:(

عمرو: لو ما اتجوزتش أضمن إني مش هتنازل عن أي مبدأ نهائي!..مش هيبقى هاممني حاجة بقى..لا فلوس ولا مركز اجتماعي ولا حاجة خالص!

حامد: ماهو كون انك مش هاتتجوز علشان ما تتنازلش عن مبادءك أو مفكر إن جوازك هايثنيك عن أشياء فده في حد ذاته تنازل وضعف

عمرو: لأ مش كدا،أنا مش بقول مش هتجوز عشان ما أتنازلش عن مبادئي،لو ما اتجوزتش يبقى ضامن إني مش هتنازل عنها فمفيش مسئوليات بقى فهتصرف زي ما أنا شايف من غير ما أبص على أي حاجة ..لكن مش مش هتجوز عشان خايف على مبادئي يعني.
و في نفس الوقت ما قلتش إني لو اتجوزت هتنازل..بس لو اتجوزت هيبقى فيه احتمال للتنازل..هيبقى عشان خاطر مراتي و ولادي و كدا.. تخيل كدا لو أنت مكان صنع الله و ولادك محتاجين حاجات كتير و مش عارف تجيبهالهم..تخيل مراتك عاوزة كذا حاجة و أنت بتقول مفيش فلوس..تخيل مش مكفي بيتك كويس و أسرتك عايشة حياة مش قد كدا.....هتاخد الجايزة!

حامد: :(

عمرو: هيّ دي الحياة!..المشكلة لو أنت حاطط فدماغك إن مستحيل هتتنازل..هتتكسر قوي لو اتنازلت.

حامد: ماهو ده اللي هايحصل،العبثية في كلامنا اننا بنتكلم من دلوقتي على التنازل واحنا في عز افكارنا !

عمرو: الواحد عجّز بدري زي ما قلتلك قبل كدا،و الحياة بتجبرك تكون واقعي..دي أزمتي في الحياة أصلاً !...إني رافض أكون واقعي،فلما الواحد بيضطر يفكر بواقعية بيتحطم..و فيه حاجات الدنيا بتفرضها عليك..يعني أنا لو سألتني دلوقتي على الجايزة هقول لك يجوعوا العيال عادي بس مش هفرّط في مبادئي!
لكن لما ألاقي ابني بيبص لحاجة عند الناس و مش عنده هقول كدا برضو؟

تاج مبكّر

التاج دا جالي من زقزوق ، و زي ما قلت بدري قوي إن يجيلي تاج،بس التاج جاي من زقزوق ، فما ينفعش أتجاهله أصلاً.

المهم..التاج إني أقول خمس حاجات عني ماحدش يعرفها..دا عموماً صعب عشان اللي بيدخل على البلوج حالياً صحابي بس..و صحابي يعرفوا عني كل حاجة ممكن أقولها..و اللي ما يعرفوهوش يبقى ما ينفعش أقوله!
عموماً هحاول...
--

1-أعبر عن مشاعري دائماً بقوّة..فالفرح يعني أن أضحك و أرقص و "أتنطط" ، و الحزن يعني أن أكتئب و أبكي ، و الغضب يعني أن أسحق ، و الحب يعني أن أموت عشقاً.

2-لم أصل حتى الآن لمرحلة مساندة فكر سياسي على حساب الآخر،ولا يشغلني كثيراً الوصول إليها،ما أؤمن به و أوَدُّ ترسيخه هو ضرورة الثورة على الظلم،الفساد،قمع الحريات و الديكتاورية في أي نظام وجدوا.

3- لا أحتقر المثليين،لكني -بالتأكيد- أحتقر فعل المثلية الجنسية..فقط لأنه معصية في الإسلام..و إن كنت غير مقتنع بأن حد المثلية في الإسلام هو الإعدام!

4-أعاني من خوف مَرَضي من الكلاب (فوبيا).

5-سعيد و فخور جداً بكل صداقاتي،أصدقائي هم اخوتي الذين اخترتهم
همرر التاج دا لساندرل و مونتي

عالم وسخة!

حامد في تدوينته دي بيقول إننا شعب وسخ و في منتهى القذارة و ما نستحقش الديموقراطية..معاه تماماً..شعب خانع و خاضع و جبان و منافق.
من فترة كنت راكب تاكسي مع سواق في الأربعينات كدا..و الطريق كان زحمة جداً بشكل مستفز، فالسواق بيقول و ملامح قرف فظيعة باينة عليه:"الله يلعن أبو دي بلد،زحمة و مفيش فلوس و الواحد مش لاقي ياكل،و كل حاجة في البلد باظت خلاص."
قلتله بسخرية كدا البركة في مبارك !
لقيت الراجل ملامحه تغيرت 180 درجة من السخط و القرف الفظيع لرضا و إحترام ! و رد قال لي بالنص: "لأ معلش..سيادة الريس محمد حسني مبارك عامل شغل عالي قوي في البلد..ربنا يخليهولنا،بس احنا اللي شعب زبالة ما بيطمرش فينا حاجة!"
بصيت للراجل بذهول و قلتله بسخرية -شديدة الوضوح-:"احنا! دا احنا ولاد كلب على رأي عادل إمام!بنضايق الرؤسا و بنعكنن عليهم !"
لقيت الراجل بيقول لي اه :"و الله معاك حق يا ابني!"
طبعاً مستحيل الراجل يكون مقتنع باللّي قاله..و مستحيل يكون ما فهمش إني بتريق،طيب ليه قال كدا،و ليه أيد جملتي كإني كنت بقولها بجد؟
عشان احنا شعب وسخ زي ما حامد قال ! الراجل خايف مني! طب اسكت يا سيدي ما تنافقش كمان.
..
الشعب ما يستحقش الحرية عشان شعب خانع وجبان..ما يستحقش الديموقراطية عشان مش بس بيكتفي بخنوعه،دا بيهلّل للحاكم الفاسد كمان !
أنا مقتنع إن الشعوب بتستحق مصائرها،الحاكم فاسد؟..اخلعه !..لو ما خلعتوش يبقى أنت تستحقه !
الحقوق بتُنتزع مش بيُحصل عليها !،لو ما عندكش إستعداد تَنتزع حقك يبقى ما تستحقهوش !

دنيا الأرقام !

ربما يكون من السخف أن تكون أول تدويناتي أغنية،لكني و منذ أن استمعت لها قررت أن تكون أول تدويناتي..فاعذروني لسخافتي !
و ربما تشفع لي كلمات الأغنية.
...
الأغنية اسمها دنيا الأرقام،و بيغنيها فريق الإنسان..من كلمات جمال عبد العزيز و ألحان هاني الأزهري.
دنيا الأرقام للتحميل

دنيا الأرقام من حواليّ عايشينها الناس
بيعِدّوا الدقات في قلوبهم من غير إحساس !
أرقام في حياتنا بتتحكّم، و تبص علينا و تتهكّم
و تقول إنسان مغرور خوّاف
بيغطّي الخوف اللي في قلبه بقناع ألوان
بس اللون بعد حبّة بيروح و بيستخبى
و ما يبقى غير مكان!
علشان إنسان من بعديهم
يسكن جوّاه و يعيش فيهم
نفس القوانين..إنسان مسكين!
..
بحلم لو أعيش من غير كاميرا من غير ألوان
و أرجع بتاريخ البشرية لأصل الإنسان!
بحلم بعيون بكرة ألقاها..
بتغني و باين في صفاها..
عيون الأطفال..بترد سؤال
رغم إن الزيف من حواليها مغطّي الأشكال!
بس الزيف بعد حبّة بيروح و بيستخبى
و ما يبقى غير مكان!
علشان إنسان من بعديهم
يسكن جوّاه و يعيش فيهم
نفس القوانين..إنسان مسكين!

مدونتـ(ـي) !

لماذا أُنشئ مدونة؟
إنه الغرور بالطبع !
الغرور الذي يدفعني لأن أحتفي بكلماتي -التي ربما لا تستحق-،الغرور الذي يجعلني فخوراً بكل ما له صلة بي.
حتى النصوص التي سأنقلها عن أحدهم..فإنني سأنقلها فقط لأنها أعجبتـ(ـني) ، حتى المدونات التي سأضع رابطاً لها في مدونتي..فسأفعل فقط لأنـ(ـي) وجدت بها ما يستحق من وجهة نظر(ـي).
إنه تقديس الذات..و متعة الحديث عن النفس !