Monday, May 07, 2007

قيمة المواطن!

طبعاً الواحد عارف إن مالوش قيمة فبلده..مش شيء جديد يعني عشان اكتبله بوست..بس كل فترة بتحصل مواقف تخلّي الواحد يعرف إنه كان متفائل أكثر من اللازم..و إن قيمته في بلد أقل من تصوره بكتير..و دا اللّي حصل لي النهاردة!
..
صحيت النهاردة الساعة 9 و أنا بطبعي بصحى متأخر أساساً..بس قلت عشان أجيب ورق البطاقة م الكلية و أعملها و أخلص بدل ما كل ما أنزل أرجع دمي محروق من المخبرين و أمناء الشرطة اللّي بيسألوني كل مرة بطاقتك فين و ضيعتها ليه و ما عملتش غيرها ليه و كم من الأسئلة الغبية.
المهم رحت جبت الورق من شئون الطلبة و استنضفت حلّاق من اللي جنب الجامعة و قمت حالق دقني عشان مش طالبة أطلع في البطاقة بدقني و كل مخبرين مصر يخنقوا عليّ أكتر..خصوصاً إني مش سايب دقني تديّن يعني أو عن مبدأ أو كدا..مجرد بستظرف شكلي بها.
حلقت دقني و رحت أعمل البطاقة في المبنى اللي في الجامعة..وقفت خمس دقايق وبعدها طلع ورق البطاقة المستعجل اللي أنا جايبه ما بيتعملش هنا..و لازم أروح المبنى الرئيسي اللّي في العباسية،قلت مش مشكلة..هيّ دقيقتين و أبقى في المبنى و أخلص...
رحت المبنى الرئيسي لقيت طابور طويــــــــــــــــــل واقف قدام المبنى..سألت و اتأكد إن الطابور دا بتاع البطاقة المستعجلة و وقفت!
كنت واقف مخنوق و روحي في مناخيري و احنا واقفين تحت الشمس و الواحد بيشر عرق و لسه حالق دقني و كالعادة ابتدت تلتهب و العرق خلّاها تلتهب أكتر.
الواحد كان متفائل جداً و تصوّر إنه هيقف نص ساعة مثلاً..فضلت واقف من الساعة 12 في عز الشمس..و سجايري خلصت على الساعة و طبعاً ما عرفتش أروح أجيب سجاير لأن الناس هتاخد مكاني!
و العسكري الروش كل ما يلاقي بنت يقوم مطلعها و احنا واقفين..لحد ما بقى عدد البنات اللي طلعوا يوازي بل و يزيد عن عدد الناس اللي واقفة!
و الواحد واقف ساكت و مستحمل..شوية و واحد لسه جاي قام مزعق في العسكري..أنا راجل دكتور ما أقفش في الشمس..دي قلة أدب..ناديلي الضابط!
طبعاً العسكري خاف و قام مطلعه..و بعد ثلث ساعة تقريباً لقينا الراجل نازل و في ايده الوصل اللي هيستلم بطاقته به!
طب حضرته دكتور و احنا ولاد كلب مثلاً؟
على الساعة اثنين طلعت أنا و 9 كمان..قلت خلاص بقى خلصت المعاناة..نص ساعة بالكتير قوي بقى و يبقى في ايدي وصل استلام البطاقة و أروّح أنام..و نص ساعة و أنا قاعد على كرسي و مفيش شمس مش كتير يعني..هستحملهم و خلاص..لكن واضح إني كنتلسه متفائل زيادة عن اللزوم.
فضلت مستني من الساعة 2 لحد الساعة 3 وربع..طبعاً مش كل دا قاعد على الكرسي ولا حاجة..لأني طمعت و قمت اشتريت بيبسي و طبعاً رجعت لقيت الكرسي اتاخد.
على 3 و ربع لقيت اسمي بيتنده و موظف خلصلي الورق في دقيقتين..قلتله طيب معلش لمّا الورق بيخلص بسرعة كدا ليه بقالنا ساعة و ربع و أنا تاني واحد اسمي يتنده!
الراجل رد بإجابة أثلجت صدري الصراحة..قال لي عشان الموظفين اللي قبلنا ما اشتغلووش في الورق عشان كان معاد انصرافهم قرّب!..و بعتولنا الورق نخلصه احنا!
قلت دا الراجل بيقول أي حاجة..مهو عرف منين يعني و هوّ لسه جاي!..بس للأسف لقيت عسكري بيقول نفس القصة دي لواحد سأله.
المهم كظمت غيظي و نزلت اشتريت علبة سجاير و طلعت مستني لما اسمي يتنده.
على الساعة 4 الجروب اللي أنت كنت طالع معاه كلّه خلص عند الموظف دا و روحنا لمكتب تاني عشان الورق يتراجع تاني و نتصور و ناخد وصل الإستلام..
المكتب كان زحمة بطريقة فظيعة و طبعاً اتطردنا من المكتب و استنينا برّه..كل شوية ألاقي واحد من الجروب اللي معايا يدخل المكتب و يطلع بالوصل و أنا واقف..مع إن اسمي المفروض يتنادى تاني إسم!
رحت سألت الراجل على اسمي قال لأ لسه ما اتندهش عليك..استنى بره.
شوية و الناس اللي معايا كلهم مشيوا..و اسأل الراجل يرد باستظراف اه مشيناهم همّ عشان قرايبنا.
(-يا رب صبرني مش عاوز أمسك في واحد فيهم و يتعمل لي قضية..ههدى و أستنى و همشي بسرعة إن شاء الله.)
فضلت مستني لحد الساعة 5 و قمت سائل الراجل على ورقي تاني..رد بنرفزة غريبة كدا يا ابني و الله لسه..قلتله طيب معلش اتأكد يمكن اسمي اتنده و أنا ما سمعتوش!..قال لي لأ مافيش حد اسمه اتنده و ماجاش استنى بره بقى.
فضلت مستني ل5 و نص و قلت يمكن الموظف اللي قبله ما بعتش الاستمارة بتاعتي..رحت سألت الراجل قال لي و الله ورقك بعتته من أكتر من ساعة و نص..أنت المفروض تكون خلصت و مشيت من زمان..روح اسأله يمكن نده اسمك و ما سمعتوش.
قلتله سألته..قال لي معلش اسأله تاني.
قلت خلاص بقى ما بدهاش..ملعون أبو البطاقة أنا أدخل أشفي غليلي من الراجل و أمشي و خلاص..كنت وصلت لمرحلة قرف فظيعة و حاسس إني هعيط من القهر.
دخلت قلت للراجل الناس كلها اللي جت معايا مشيت و أنا ما مشيتش و الموظف التاني قال إنه بعت ورقي قبل ورق الناس اللي مشيت دي و الله شكلك ضيعته و قاعدين كلكم مش دريانين بالدنيا.
كان صوتي عالي و حاد بس مش زعيق يعني..لقيت ضابط معلّق نسر كدا جالي و بيقول لي ايه المشكلة؟
قلتله..قال لي يمكن نادى اسمك و أنت ما سمعتوش.
قلتله أنا واقف من بدري ما اتنقلتش بس مع ذلك سألته قال مافيش حد ناديته و ماجاش..قال لي طب اسمك ايه و قام مدوّر في كل الإستمارات ..ما لقاش اسمي فيهم:s
قام منادي الموظف مزعقله و قال له أنت ضيعت الاستمارة ولا ايه..هاتلي الاستمارات اللي خلصت طيب.
قعد يبص فيها ما لقاش اسمي..شيء إلهي خلّى الراجل يديني كل الاستمارات أبص أنا فيها..فلقيت استمارة خلصانة مكتوب فيها عمر عصام!
قلتله دي غالباً استمارتي بس أنا اسمي عمرو مش عمر..قام مصلح الاسم و مديهالي.
الضابط مسك الموظف يزعقله و بتاع..و موظف تاني لقيته بيقول لي معلش حصل خير !
قمت مزعّق بقى و قلتله لأ ما حصلش خير..مش لازم أفضل مستني كل دا يعني عشان هوّ مش دريان بالدنيا..منا سألته و قال ما ناداش على حد و ماجاش!
ليه الاستهتار بآدمية الناس للدرجة دي.
قال لي سألت مين؟ قلتله البني آدم اللي جنبك و قمت ماشي.
..
للدرجة دي الواحد رخيص يا جدعان..دا الواحد رخيص في الحياة العادية..يعني لا في سجن ولا معتقل ولا حاجة خالص..دنا بعمل بطاقة !
حسبي الله و نعم الوكيل.
رغم إني حاسس إن من واجبي أساهم في تحويل البلد دي لمكان أفضل..بس يوم عن يوم بزداد يقين إني مش هقدر أعيش هنا :(

1 comment:

عطشان said...

يا راجل احنا شعب ابن كلب على رأى الأبنودى عايشين فى الزباله اقولك ايه ولا ايه ...
دى قله ادب يا راجل !