Thursday, January 10, 2008

حكاية عن عصفور و عن ورقة شجر!

قلبِك دا كان ورقة شجر
و أنا قلبي كان عصفور شريد
ف البرد و الخوف و المطر
كنتي له عش أخضر سعيد
..
لو يوم يئس..بتطّمنيه
لو يوم وقع..بتقوّميه
أو يوم خبَا
بتزوّدي لمعة عينيه
بتضحّكيه..بتريّحيه...
لو حزنه فاق حتّى المدى
و كل الحدود!
لو فرحته يوم نسيته..
بضحكة عينيكي...قوام تعود!
..
طَبْ ايه حصل؟
حلمك قوام مات و اندثر؟
حُبّي ف قلبك انكسر؟
ولّا الزمان..خلّى الفراق
شيء سهل عندك يُغتفر!
..
((- أنا آسفة..الوضع اختلف
الحُب؟..دا نوع م الترف!))
و بإيد غريبة -ماهيش إيديكي!!-
لقيت جناحي بينكسر!
النور في عيني بينحسر
و الأرض بتقرّب قوام
صرّخت أنادي في الزحام
"ورقــــة شجـــــــــــر"
((- حاول تعيش من غير جناح
الحلم أصبح مش متاح!))
.
.
.
مشهد سريع..أخر ما كان
ورقة شجر..وسط الرياح!
و بَعده كان الاصطدام!!
عمرو النحراوي
10/1/2008


"العنوان من قصيدة قديمة لأحمد أخويا"

9 comments:

متغيرة شوية said...

يااااه

بقالي كتير مقرتلكش حاجة يا عمرو
النص ده بيفكرني بزمان قوي ايام الكالتشرال ، كان بيعجبني شغلك جدا

ولسا بيعجبني بجد
ولسا مصرة انك مفروض تركز على كتابتك وهتبقى حاجة حلوة قوي

ربنا يوفقك

bani-adam said...

مؤلمه بجد
شكرا انك بتكتب حاجات زي دي
كل سنه و انت طيب

YOTTA said...

جميلة أوى دى يا عمرو
وحزينة و بتوجع أوى
..
.
بس الحلم لسه متاح
صدقنى
وكل مابتقابلنا حاجات صعبة تكسر حاجات جوانا لازم/هنضطر نرميها ورانا ونفضل نحلم
أنا عارفه ان صعب ننسى ..لكن احنا اللى بنختار..نعيش نندم على اللى فات ولا نحاول ننساه ونبص للى جاى
..
.
سيب اللى يكره يكره
وانت احلم ببكره
مع انه لسه ماجاش
مهما تحاصرك همومك
ويلومك مين يلومك
لأ ماتعيشهاش
بلاش
.
.

مصطفى اسماعيل said...

جميلة فعلن
الذكرى بتقتل


معلش ليه تعليق على الجزء بتاع
كنتي له عش أخضر سعيد
شايف انها اخلت الى حد ما بالوزن
ممكن تبقى كنتى له عشه السعيد

انا اسف لتدخلى
بس عشان عجبتنى
:)

JuSt_hUmAn said...

متغيرة شوية..
جميل إن النص عجبك..شكراً يا سلمى
..
بني آدم..
سعيد بزيارتك للبلوج..و أنت طيب..و أنا اللّي بشكرك لقراءتك و اهتمامك بالتعليق
..
يوتّا..
شكراً بجد على كلامك(f)..
لكنّي ما أعتقدش إن أوبشن النسيان بإيدنا.
..
مصطفى اسماعيل..
مبسوط إنها عجبتك..و مافيش أي داعي للاعتذار طبعاً
أنا ما بفهمش في قواعد الوزن قوي..فبعتمد على ودني..عموماً هحاول أقراها تاني و أقراها بتعديلك و أشوف انهي أنسب...بس بعد ما أهدى شوية : )
سعيد بزيارتك و اهتمامك يا مصطفى

amraction said...

كتابتك جميله جدا يا عموور.. جات ع الجرح زى ما بيقولو
keep it up :)

amraction said...

وبالمناسبه صحيح.. اسمحى احط اللينك بتاع البلوج بتاعك عندى

JuSt_hUmAn said...

الله يكرمك يا عمرو..مبسوط إن البوست عجبك..و طبعاً مش محتاج تستأذن عشان تحط اللينك!

العقل اولاً said...

دائماً حسك مرهف من أول أبيات قرأتها لك منذ ما يقرب الخمس سنوات, أحست يومها بأنك تملك الكثير من الشفافية في كلماتك وتحتاج دوماً لأن تفرغها على الورق حتى لا تفقدها فيضيع معها إحساسك ....

دوم بود وسعادة صديقي ....