Wednesday, May 14, 2008

!Hasta la victoria siempre



النهاردة 14 مايو..الذكرى الثمانين لمولد جيفارا الله يرحمه والذكرى الستين للنكبة..مش حاجة غريبة إن الاتنين بيتوافقوا؟
مش هبقى تقليدي وممل وأعمل أبو العرّيف وأكتب كلمتين عن حياة جيفارا الكل عارفهم وموجودين في مليون ألف سايت..وعموماً دا جيفارا في الويكي العربي، و الويكي الإنجليزي.
حابب بس في ذكرى ميلاده أحط شوية ملفّات متعلقة به، وأفضفض شوية،الكلام من غير ترتيب ترتيب وعشوائي كدا لأني مش حابب ألزم نفسي بأي شيء..عاوز أبقى بتكلم براحتي وأكتب اللّي ييجي فبالي..

من الأشياء الطريفة اللّي زقزوق لفت انتباهي ليها إن مبارك مواليد 1928 برضو زي جيفارا!..مبارك أكبر من جيفارا بعشر أيام، وسبحان الله جيفارا مات سنة 67 و مبارك لسّه قاعد لنا:s
..
فيه حاجتين بيخنقوني جداً لما حد يقولهم...
الأولى لما ييجي حد يقول لك "بتحب جيفارا الملحد؟!.. يا أخي طب مهو فيه في الإسلام رموز كتير ولّا أنت زي القرع تمد لبرّه!"
طب وأنت مالك ومالي أنا كمان إذا كان ملحد ولّا لأ! هوّ عشان أحب حد وأحترمه لازم يبقى مسلم يعني؟! لازم يبقى زيي بالظبط وإلّا أرفضه؟!..فيه بقى واحدة عبقرية قالتلي فمرة جيفارا دا أصلاً تلاقيه كان غاوي شهرة! مادام مش "بيقاتل في سبيل الله" يبقى مدّعي!

تاني حاجة بقى بتخنقني لما تلاقي حد يساري يقول لك "شفت جيفارا؟..شايف بقى اليساريين عاملين ازاي؟"..وبقى جيفارا سبّوبة لليسار!
بغض النظر عن احترامي لليسار..جيفارا مش نتاج فكر اليسار.. جيفارا كان هيبقى نفس الشيء أياً كانت أيدلوجيته..بعدين مهو جيفارا كان بيوجه انتقادات حادة للاتحاد السوفييتي مثلاً!
..
من الحاجات اللّي بتخنقني برضو إن جيفارا بقى عامل زي "الكوكاكولا"!موجود في كل حتّة..تيشرتات وكابات (جمع كاب يعني)عليها صورته بيلبسها كل كلب بحر فيكي يا مصر (وفي العالم كله)!..كمية محلات فظيعة متسميّة على اسمه برضو وحاطين صورته على لوحتها..والمشكلة إن معظمهم كلاب بحر برضو!
فيه حلاق في مدينة نصر مسمي المحل بتاعه جيفارا وحاطط جوّا المحل صورة لمبارك!!..رحمتك يا رب.
..
بتخنق كمان إن الإسم بيتنطق في مصر غلط، ولحد سنتين تلاتة فاتوا ما كنتش أعرف النطق الصح أصلاً..النطق الشائع جيفارا بجيم معطّشة (زي حرف الـ J) لكن النطق الصح بجيم مصريّة (زي حرف الـ G)
..
من التناقضات الطريفة برضو إن مرة كاسترو قال عن نفسه وعن جيفارا وباقي الثوار في كوبا إنهم محرِّرين! ساعتها جيفارا رد عليه وقال لأ أنا مش محرر! مافيش حاجة اسمها محررّين..الشعوب بتحرّر نفسها!.. حصل ايه بعد كدا لكل واحد فيهم؟
جيفارا فضل ماشي على نفس الخط بتاعه.. وكاسترو بقى أوسخ من باتيستا وفضل قاعد لحد 2008، وبعدها راؤول Raúl أخوه مسك الحكم:s ..حكمتك يا رب!
..
من الجمل الجميلة لجيفارا الجملة اللّي بيقول فيها إن الحكّام الزبالة بيتغيّروا عشان ييجي بدالهم حكّام تانيين يبقوا زبالة!
ما عنديش فكرة امتى جيفارا قال الجملة دي وفأنهي موقف..بس مش تنطبق بالظبط على كوبا (باتسيتا وكاسترو)؟!
..
ما عنديش كلام أقوله عن ذكرى النكبة..لكن أنا مؤمن إن مافيش حاجة اسمها سلام مع إسرائيل تحت أي ظرف وبأي شروط! عشان يبقى فيه سلام بالنسبالي يبقى مافيش دولة اسمها إسرائيل! الأراضي الفلسطينية بالكامل ترجع للفلسطينيين ويزال إسم إسرائيل تماماً من أي مكان، وساعتها عشان احنا ناس محترمة نسمح "للّي كانوا إسرائيليين" إنهم يقعدوا في فلسطين وياخدوا ورق إقامة أو ما شابه، لأن شيء قاسي جداً إن حد اتولد واتربّى وعاش في مكان معين إني أطرده منه.. فممكن يُسمح لهم يقعدوا في فلسطين بشرط إن اللّي يقعد يكون أرتكبش مجازر وما شابه من القرف اللي بيحصل دلوقتي، وفي حالة إنه عمل أي تصرف مش مظبوط يتطرد بره على طول.
فيه مقالة جميلة كانت اتنشرت في إسلام أون لاين من فترة:
حسام تمّام..هل يستفيد الفلسطينيون من خبرة حركة التحرر الوطني الجزائرية؟

..
دا ملف مضغوط فيه 6 مقاطع فيديو قصيرة لجيفارا في مواقف مختلفة..الملف مساحته أقل من 7 ميجا، والمقاطع بالأسباني طبعاً بس مُترجمة إنجليزي.


ودي الأغنية اللّي كتبها ولحّنها وغنّاها الفنان الكوبي الثائر كارلوس بابلو ، وغنّاها بعده ناس كتير..حطيت الأغنية لأكتر من شخص...
ودي كلمات الأغنية بالأسباني، وترجمتها بالإنجليزي





ودا الكليب اللّي عملته ناتالي كاردون للأغنية


الكليب جميل جداً، لكن يعيبه مسخرة الرقص اللّي ناتالي رقصته في الأخر بلا مبرر!

ودا الكتاب اللّي "هـ.أ.غروس" و "ك.ب.فولف" عملوا معظمه من مذكرات جيفارا..الترجمة رديئة جداً والقراية من الكمبيوتر متعبة قوي برضو..بس يبقى الكتاب ممتع ويستحق القراية.
ودا كتاب حرب العصابات اللّي جيفارا كتبه..الكتاب بالإنجليزي ومجهد نوعاً ما في قرايته ( ما قريتش منه لحد دلوقتي غير عشر صفح) بس أعتقد إن من المفيد قرايته خصوصاً للذكور.
ودا ملف التورنت والترجمة لفيلم Diarios De Motocicleta (يوميات دراجة بخارية) الفيلم ناطق بالأسباني برضو، لكن زي ما قلت فيه ملف ترجمة عربي، الفيلم بيعرض رحلة جيفارا في أنحاء أمريكا اللاتينية قبل ما يوصل المكسيك ويقابل راؤول...الفيلم جميل جداً والولد المكسيكي اللّي عمل دور جيفارا (جائيل جارثيا برنال) فيه شبه كبير من جيفارا لمّا كان صغيّر وبشكل عام أداءه كان حلو، المشكلة بس في الفيلم بالنسبالي إني مش عارف هل جيفارا ما كانش بيدخّن سيجار لحد ما راح كوبا؟ لأن في الفيلم جيفارا ما دخّنش ولا سيجار!
بالمناسبة التورنت بطيء نوعاً ما لأن عدد السيدرز قليّل جداً..فياريت اللّي يحمّل الفيلم يعمل سيد للفيلم بالمساحة اللّي نزلها ع الأقل!
وأخر حاجة..الويكي فيه كذا قصيدة اتكتبوا في رثاء جيفارا، طبعاً من ضمنهم "جيفارا مات" بتاعة نجم.. ودي أغنية جيفارا مات بتاعة الشيخ إمام..الأغنية موجودة عند معظم الناس بس قلت أرفعها احتياطي.
..
شكراً لأنتي فيروس على المجهود اللّي بذله عشان يظبّط صورة جيفارا على العلم (f)

13 comments:

ٍSOU said...

تعرف انا اكتر من مرة اقرى اسم جيفارا و كل مرة اقول انا هقرى عنه و ادور عنه واقرى جملتين و اكسل اكمل .. بوست رائع بجد

مؤنس فرحان said...

بوست رائع يا عمروو

ماشاءالله انت جمعت مصادر كتير لجيفارا .. انا يمكن زمان ماكانش عندى اى معلومات عن جيفارا لحد من حوالى سنتين تقريبا شوفت الفيلم التسجيلى اللى كانت عاملاه الجزيرة الوثائقية عن حياة جيفارا

وطبعا استمتعت قريب برائعة احمد خالد توفيق فى فانتازيا لما كتب عنه وعمل مزج جميل بين قصة جيفارا والقضية الفلسطينية
..............
جيفارا عاش طول حياته ثورى رافض لنظم الحكم الدكتاتورية

سبب شهرة جيفارا وتعلق الناس بيه فى العالم كله بدون تمييز او حدود ان افكاره كانت عالمية .. كان بيحلم بشعوب حرة بغض النظر عن الدول والسياسات .. وموش لبلده بس دا كان مستعد انه يسافر لأى مكان فى العالم تسنح له الفرصة فيه انه يناضل مع ابناؤه ضد اى ظلم بيتعرضوا له

واللى بيقولو دا شيوعى دا ملحد دا موش عارف ايه .. دوول متخلفين .. مـتـخـلـفـيـن
.................
إسرائيل عمر ماحيكون فى بيننا وبينهم اى سلام .. الحرب جايا جايا اللى بيحصل اننا خايفين من بعض لاننا ضعاف دلوقتى وهما كذلك
عارف انت نظام اتنين كل واحد عايز يخلص من التانى بس خايف يبدأهو الخطوة الأولى وكل اللى بإيديهم حركات من تحت لتحت ومن بعيد لبعيد وانهم يتشطرو على الصغيرين اللى حواليهم
...................

بوست جميل جدااا

mostafarayan said...

اشكرك علي هذه المعلومات القيمة ع هذا الرجل العظيم
ومش شرط طبعا علشان نعجب بحد انه يكون مسلم دة تفكير ضيق قوي
تحياتي ليك

Amr Fahmy said...

البوست مميز بالفعل
لكن زي ما قلت لك، لم يعلق سوى الرجال... بنات حواء ضيوف شرف في الكلام اللي يتطلب تحرك وقضية... كنت أتمنى أشوف رد أنثوي واحد حتى

مــهــا said...

فى الحقيقة ان من أول ما الموضوع نزل و أنا بتابع الردود ..بس استفزنى أوى رد عمرو ..فقلت أكسر قوقعتى بتاعة الإمتحانات و أدخل أقوله
ان
.. سو ..أول رد
بنت , شفت ؟ ماخليناش -إحنا النساء- فى نفسك حاجة اهو ..
:)
تمنيت تشوف رد أنثوى واحد ..شفت بس ماركزتش ..

Amr Fahmy said...

وأنا قلت والله أكسر قوقعة الشغل وقتي وأرد
بغض النظر يا مها، حتى في مدونتي نفس الموضوع، كلام ليه أبعاد رومانسية أو ذاتية يبقى التعليقات عليه بترف، كلام عن فلسطين مثلاً أو عن حاجة تاريخية يبقى مفيش غير حد أو اتنين ومبيبقوش بنات، وده اللي خلاني بعد أول يومين أقول لعمرو إن كالعادة البنات مردتش، وموقفه هو من القصة دي هسيبه يقوله في تعليقه...
بردو أتمنى إن الردود الأنثوية اللي هتيجي - لو كانت هتيجي يعن- متبقاش على ردي أنا بل تبقى عن موضوع البوست نفسه

بيقولوا سايكو said...

إيه الاستفزاز ده؟ .. د ه دعاية مثلا علشان البنات ترد .. عامة أنا كأنا مارديتش لسبب بسيط .. هاقوله الموضوع مميز و بعدين يعنى .. ده مش رد .. لما يكون الموضوع عن حاجة كبيرة يبقى طبيعى إن اللى يرد يكون فاهم أو على الأقل واعى بالحاجة الكبيرة دى..كل ما أقول هاقرا عن جيفارا أو أعرف معلومات محترمة عنه مش باعرف أجيبها منين .. باتضايق من القراية من على الكمبيوتر و الكتب يا إما مش بالاقى و لو لقيت مابابقاش عارفة إذا كان الكتاب ده فعلا كويس و لا لأ ... لإن جيفارا بقى موضة و أى حد عايز يعمله قرشين يروح يضرب له كتاب عن جيفارا أو يعمل بوسترات عليها صورته علشان الولاد تبقى روشة و البنات معجبة بشكل الشاب الوسيم المناضل و شكرا على كده .. ده بالنسبة لجيفارا
بالنسبة لإسرائيل فنعم!!.. مهما قلنا ده مش هيغير حاجة .. أحمد توفيق كاتب مقال حلو فى الدستور اليومى 19/5 ... لو حد عرف يقراه هو بالظبط بيقول اللى جوايا

و آسفة يا عمرو على التطويل و على لاسخافة

JuSt_hUmAn said...

Sou..
مبسوط إن البوست عجبك.
..
مؤنس..
العددين بتوع فانتازيا حلوين جداً، من أكتر أعداد فانتازيا اللّي بحبهم، مبسوط إن البوست عجبك يا مؤنس.
..
مصطفى..
معاك طبعاً إن دا تفكير ضيق ومتخلف كمان..مبسوط إن البوست عجبك.
..
زقزوق..
بغض النظر عن موضوع ردود البنات ع البوست..البوست عبيط أصلاً يعني والردود عليه لا تعني شيء، بس بغض النظر عن البوست وبغض النظر عن عنصريتي الشديدة تجاه البنات، لكن نادراً لما تلاقي بنت مهتمة بجد بأي قضية، طبعاً ما أقصدش المدعّيات اللّي "بيرشقوا" في أي قضية شوية وتلاقيهم في نفس الوقت كل تصرفاتهم عكس اللّي بيقولوه تماماً.
..
مها..بترد على عمرو فماليش دعوة.
..
آيات..
يا آيات لو دعاية عشان البنات ترد كان زقزوق عمل الدعاية دي لمدونته مش لمدونتي!
بعدين الكلام اللّي أنا كاتبه عبيط يعني..البوست معظمه لينكات مواقع تانية أو لينكات لملفات وكدا، اللّي أنا كتبته لا يتعدّى فضفضة مكتوبة بأسلوب الكلام على القهاوي!
فمش معنى إن حد ما يردّش عليه إن دا يمثّل أي شيء يعني، لكن زقزوق بيتكلم إن بشكل عام عادةً الكلام عن أي قضية ما بيلاقيش صدى من البنات ودا بسبب نقص اهتمام البنات بالقضايا العامة عموماً، ويوم ما بنت تتبنّى قضية معيّنة تبقى حقوق المرأة وحرية المرأة و"كلام فارغ" كدا، وهنّ أكثر الناس حرصاً على كبح حريات أنفسهن أصلاً!

بيقولوا سايكو said...

بص يا عمرو أنا مش متبنية أى قضية..لا حقوق مرأة و لا باتكلم عن أوضاع البلد المتردية مش خوف مثلا و لكن عدم فهم .. و بصراحة مابقتش عايزة أفهم حاجة لإن كده كده مفيش حاجة بتتصلح .. مجرد باعرف قشور القشور .. صحيح أنا عندى إيمان إن حاجات كتير ينفع تتغير و هتتغير بناس مؤمنة بقضاياها..بس الفكرة إنى عمرى عمرى ما قابلت حد قدر يفهمنى اللى انا عايزاه و يصبر علىَ و على اسئلتى لإنى لسة بافهم لأول مرة و تاريخ طويل

بالنسبة بقى لبتوع المرأة أنا عمرى ما قابلت حد منهم بس ما اتوقعش من حد إنه ما اخدتش حريته الشخصية و يحاول إنه يدور على حرية الوطن مثلا .. من يومين سمعت معز مسعود كان بيتكلم عن حق المرأة .. و اكتشفت إننا عايشين فى مجتمع ذكورى متعفن على رأى ياسمين

YOTTA said...

مكنتش ناوية ارد لانى مش هقول جديد..معلوماتى عن جيفارا قليله جدا..وكتير فكرت اقرا عنه بس لسه ماحصلش..لاسباب شبه اللى قالتها آيات
بالنسبه لذكرى النكبه فزى ماقلت "مفيش حاجة اسمها سلام مع اسرائيل" اكيد لكن الكلام اللى بعد كده حلم بعيد اوى صعب جدا يتحقق فى ظل الظروف اللى حاصله دلوقتى

وانا باقرا التعليقات بقى لمحت كلام عن الاهتمام بالقضايا والبنات الوحشين المنعزلين عن القضايا العامه ويوم مابيتبنو قضيه تبقى حقوق المرأه وحريتها -واللى هى كلام فارغ على حد قولك- !!
مبدئياً لو بتتكلم عن جيلنا فبتوع حقوق المرأه تقريبا اختفوا .. بل يمكن بعض الرجاله دلوقتى هما اللى بيدورو على حقوقهم او بمعنى اصح عايزين يثبتو انهم الاحسن.. وده واضح كمان فى الردود اللى فوق..
ماشى متفقه ان مفيش بنات كتير مهتمين بالقضايا العامه
بس قولى مين من الشباب –الولاد يعنى- متبنى قضيه؟؟او مؤمن بيها؟
هل تبنى قضيه ما هو انك تحط شعار للجمعيه المؤمنه بقضيتك دى ف بلوجك مثلا.. و تشترك ف الجروب بتاعها ع الفيس بوك.. وكل ماتشوف حد تقعد ترغى معاه عن القضية دى؟؟
لو اعتبرنا مثلا " الاهلى والزمالك ومرتضى منصور" قضيه.. او "يا ترى شريط منير نازل امتى " دى قضيه
يبقى ماشاء الله ع الولاد ويتحسدوا !

وماقدرش الومهم على تفاهتهم الحقيقة.. لان احنا كجيل –ولاد وبنات- بدراستنا اللى درسناها وتربيتنا ف بلد زى مصر ماتؤهلناش اننا نتبنى قضايا.. واللى مؤمن بقضيه مع الوقت بيضطر يتخلى عنها عشان يعيش.. احنا جيل عايز اللى يتبناه
ولو جينا نشوف "معظم" الولاد دلوقتى يا اما متمسكين بحلم الثراء السريع فاللى مأنتخ ع السرير مستنى ثروة من السما.. او حد ييجى يقوله تعالى اشتغل مدير.. او مستنى شغل تفصيل على مزاجه
ده غير بقى اللى عايزين يقعدوا ف بيوتهم ويبقو "رجالة" بيوت. يعنى حتى مش قادرين يشيلو مسئوليه نفسهم..يبقى قضايا ايه اللى بيتبنوها!

فياريت بقى ف مسأله تبنى القضايا دى مانقولش بنات وولاد ونقسمها احزاب.. لان الموضوع يخص جيل كامل متنيل على عينه
ياريت بس كل واحد يتبنى قضيه نفسه..يعرف ع الاقل عايز يعمل ايه ف حياته ويعمله ازاى.

معلش طولت اوى

Amr Fahmy said...

والله غرفتي مفيهاش صورة لحسن نصر الله وعربيتي معليهاش بادج جيفارا
بس بحاول أجيبهم وأعلقهم
بس الفكرة إني أعرف مين دول وأثروا في حياتي وطريقة تفكيري
وعايز أقول بس إن من الرد الأخير فكرني بالآية اللي في سورة الإسراء
"وقالوا لن نؤمن لك حتى تفجر لنا من الأرض ينبوعا"
والآيات اللي بعدها في نفس السياق، البنت اللي مش عاجبها الشباب اللي بيقول إنه مؤمن بأفكار وقضايا في حين هي مفترشة رصيف الحياة مبتعرفش غير الانتقاد بس، ده ببساطة لأن الإنسان عدو ما يجهله
هي بتقول وعملوا ايه بقضيتهم؟ بالنسبة لها ولا حاجة، هي متخيلة إننا نروح العراق نجاهد مثلاً، وساعتها لو رحنا فعلاً يقولك شباب تافه انخدع بالشعارات ودول نتاج التعصب الديني والتردي الاقتصادي وكان قدامهم يقعدوا يبنوا مجتمعهم ووطنهم ومرضيوش
من الآخر كدة كدة بنت بالعقلية دي مش هترضى بأي حاجة
إلا حاجة
وهي العريس
العريس اللي هتحبه حتى لو أول مرة شافته في الصالون عشان من طرف خالتها مثلاً، ده اللي يقنعها، وهيبقى بالنسبة لها نموذجي حتى لو شاب تافه من اللي بتتريأ عليهم، حتى لو مجرد إنسان ناجح عملياً لكن ملوش لا طعم ولا رأي ولا فكرة ولا أي حاجة
ثانياً أنا مش فاهم بأي وش البنات بتدافع وهما فعلاً بيعترفوا إنهم |"جهلة" عن شخصية غيرت أفكار الملايين زي جيفارا، يمكن مهمتنا فعلاً هي إننا نعمل محو أمية فكرية بس المشكلة إن محدش هيبقى عايز
"إنك لا تهدي من أحببت"
ماكانش عمري أتمنى أتكلم باللهجة دي، بس الفكرة إني هقول مثلاً في كليتي تحديداً فيه بنتين زي اخواتي تمام عقلهم يفوق عقل أي ولد عرفته في حياتي، وليهم فكرهم وقضاياهم وآراءهم وبردو بنات شكلهم حلو ومحتفظين بأنوثتهم
بس الفكرة إن اللي غير كدة أو اللي مش عارفين أو حتى عايزين يبقوا كدة ملهمش غير فكرة الرفض العام من بعيد
محدش بردو دافع عن الولاد أو اتكلم باسمهم، أنا وعمرو دايماً نستخدم مصطلح كلاب بحر وده مصطلح مذكر، لسة مقلناش كلبات بحر

YOTTA said...

على فكره نٌص الرد بتاعك يؤكد انك فهمت كلامى غلط
وانا مش هاوضح طبعا.. لانى مش مع اسلوب الحوار ده.. ..انا ان كنت اتكلمت او اتريقت زى مابتقول فاتكلمت عموما ،ماقصدتش حد بعينه وقلت "معظم" مش كل..وده رأيى الشخصى وانا حرة..لكن كلامك واضح انه موجه ليا..وفيه اهانه واضحه..كان ممكن نحترم بعض اكتر من كده
شكرا

Amr Fahmy said...

مفيش أي كلام موجه لصاحبة الرد غير الفقرة الأولى لحد نهاية الآية
بعد كدة قلت "البنت للي..." وهكذا، يعني حطيت شوية مواصفات وقلت اللي ينطبق عليه الكلام ده هو اللي ياخد الكلام على نفسه
فكل واحد والله يشوف هو كدة ولا لأ، وعلى حسب ما المرايا تقول له ييجي يتكلم
كل واحد حر في رأيه، وحر ياخد الكلام على نفسه بردو