Sunday, November 30, 2008

لمحات (4)

-الناس بقت وحشة قوي!
-ومن امتى الناس كانت حلوة؟!
-مش عارف، بس وأنا صغيّر سمعت ماما بتقول فمرة الناس بقت وحشة قوي، فافترضت إنها عاصرت زمن كانت الناس فيه مش وحشة، أو ع الأقل مش وحشة قوي!
***
-أكاد أجن! لماذا تخسر كل هذه البطولات؟ بإمكانك تحقيق الفوز فيها بسهولة!
- خسرتُ بطولة العالم ، فماذا يضيرني أن أخسر بضع بطولات صغيرة؟!
***
وقف على شاطئ البحر يدخّن غليونه باستمتاع ويداعب الماء بقدميه، يتأمّل الدخّان الأقرب للبياض المنبعث من الغليون، ثم يتأمل الدخان الأقرب للسواد المنبعث من أنفه وفيه، ضحك في البداية لفكرة أنه يلوّث الدخان! ثم تخيّل أن الدخّان أسود لأنه يخرج المشاعر السلبية بداخله، تُرى كم عدد أطباق التبغ التي تلزمه ليعود كما كان؟
***
-لماذا عبرت الطريق بهذا البطئ؟ أكنت تنوي الانتحار؟
-لو قررت الانتحار لألقيت بنفسي أمام إحدى السيارات المسرعة!
-ولو كنت طبيعياً لأحثثت الخطى!
-فلنقل إذن هي لا مبالاة تجاه الحياة.
***
-سلام عليكم، علبتين LM أحمر
-وعليكم السلام ورحمة الله وبركاته (يرد السلام ثم يناولني ما طلبت)
(أعطيه عشرة جنيهات ولا يعطيني باقي، أهم بالرحيل فيستوقفني بسؤال)
-هيّ السجاير مش حرام يا شيخ؟!
(بابتسامة ساخرة)
- الله أعلم، بس الأكيد إن النص جنيه اللّي أنت أخدته حرام!
(أحّثُ الخطى فلا أعطيه الوقت للرد)
ملحوظة: علبة الـ LM بخمسة جنيه إلا ربع، لكن المعظم بيبيعوها بخمسة جنيه.
***
-سلام عليكم، علبتين LM أحمر
-وعليكم السلام ورحمة الله وبركاته، هيّ السجاير مش حرام يا شيخ؟!
(بابتسامة ساخرة)
-مش أنا -الشيخ- بشربها؟، تبقى حرام ازّاي بقى!
(يتسمّر ناظراً لي في دهشة وعدم فهم)
(بسماجة أسأل) -مافيش LM أحمر ولّا ايه؟
(في صمت يعطيني ما طلبت، أنقّده عشرة جنيهات ولا أنتظر الباقي، ألقي السلام وأبتعد...ولا أسمع ردّاً لسلامي!)
***
-سلام عليكم، فيه سيجار café crème سادة؟
-وعليكم السلام ورحمة الله، اه فيه ثواني.
(يمد يده لأحد الرفوف ويناولني ما طلبت..فأخذه وأعطيه نقود..ثم يقول بينما يعطيني الباقي)
-أنا عمري ما شفت شيخ بيشرب سيجار!
(بابتسامة ساخرة)- ولا أنا!
(ثم أنصرف)
***
في إصدار آخر لقصة "الجرادة والنملة" ظلّت النملة تكد وتعمل استعداداً للشتاء القادم، بينما الجرادة تسخر منها وتلهو مستمتعة بوقتها، لكن الشتاء لم يأت أبداً!
ظلّت النملة تعمل حتى ماتت كمداً على شتاء لم يأت، بينما عاشت الجرادة هانئة تستمتع بوقتها!
***
ببساطة متبجحّة تجاوزني أحدهم ليقف أمامي في الطابور ليقطع تذكرة "المترو" قبلي..
-لو سمحت..حضرتك كدا أخدت مكاني
(باستنكار)-معلش يا أخي..أنا مستعجل
-سبحان الله..وحضرتك عرفت منين إنّي مش مستعجل؟!
***
بينما أنتظر دوري في الطابور لأقطع تذكرة "المترو"، ربت أحدهم على كتفي قائلاً:
-لو سمحت..ممكن تقطعلي تذكرة معاك..معييش فكّة بقى فهات الجنيه وخد عشرة (يمد يده ليناولني النقود)
(لا أمد يدي)-بس كدا حضرتك هتاخد دور حد، كإنّي وقّفتك ورايا.
-يا عم وأنت مالك، وأنت خسران حاجة؟!
(أصمتُ لبرهة بحثاً عن إجابة تناسب تبجّحه)
- بنفس منطقك ولا كسبان حاجة! آسف.

14 comments:

Known as PHYSCO said...

والله يا شيخ فراس مش عارفة أقولك إيه .. بس على فكرة أنا لومكانك كنت أخدت النص جنيه علشان أنا دماغى .. ولا بلاش :)

بس من الملاحظ .. إنك بقيت تركب المترو كتير .. ربنا يعينك ياشيخنا :P

Anonymous said...

عاجبني ردك علي رجل المترو أوي

بقالي زمن ما جيتش هنا..إزيك؟

amraction said...

ازيك يا عمووور.. عامل ايه..
ال ام احمر ليه.. مالها الروسمانز..
على فكره ماليش فى السجاير..

-الناس بقت وحشة قوي!
-ومن امتى الناس كانت حلوة؟!
-مش عارف، بس وأنا صغيّر سمعت ماما بتقول فمرة الناس بقت وحشة قوي، فافترضت إنها عاصرت زمن كانت الناس فيه مش وحشة، أو ع الأقل مش وحشة قوي!

جامده موووووت الحته دى..

وكمان حته الجراده والنمله..هيا بمناسبه اننا فى شهر 12 ولسه الشتا مجاش؟؟ ولا ايه؟؟

JuSt_hUmAn said...

آيات..
لو أصريت أخد النص جنيه هيبقى الرد إن أنا ببيعها بكدا! وساعتها هدوخ عشان أشتري العلبة بسعرها، الواحد بيكبّر دماغه طالما الموضوع عام، بمعنى إن معظم أكشاك السجاير بيبيعوها بخمسة.
وبالنسبة للمترو بقى فهو أكتر وسيلة مواصلات بكرهها في الدنيا، بس حظي وقّعني فيه يومين ورا بعض، لكن الحمد لله ما بركبوش على طول.
كل سنة وأنتِ طيّبة.
..
كاميليا..
أنا كمان انبسطت من ردّي بعد ما قلته.
الحمد لله كويّس، كل سنة وأنتِ طيّبة.
..
عمرو..
الحمد لله كويّس، تسلم لسؤالك
حتة الجرادة والنملة دي كاتبها بقالي كتير قوي، فمش فاكر والله كانت بمناسبة ايه، بس مش مرتبطة بالشتا يعني.
كل سنة وأنت طيّب يا معلّم.

عطشان said...

كويس أنك ما كتبتش عن اللى بيتسلبط و بيشترى السجاير بخمسة و نص

فطست على روحى من الضحك فى التلات لمحات بتوع السجاير على الرغم من أنك حيتلى عليهم بس ردودك قلشة اوى :D

مُزمُز said...

عيد سعيد يا عموووووور

:)

Anonymous said...

كل سنة وانت طيب يا عمرو

JuSt_hUmAn said...

عطشان..
أيوا بتتسلبط طبعاً يا أبو برد داخلي:p
بطّل تسيّح لنفسك بقى:p
..
معاذ..
ربنا يكرمك يا معاذ..كل سنة وأنت طيب
تهنئتك عنيتلي الكثير فعلاً (f)
..
كاميليا..
وأنتِ طيبة (f)

ٍSOU said...

اصل الشتا مالوش معاد ..ظلت النملة طوال الصيف تجمع الطعام فى انتظار الشتاء و طال الانتظار حتى فسد كل المخزون..وبردوا لسة قاعدة مستنية

JuSt_hUmAn said...

sou..
على رأي محمد صبحي في وجهة نظر:
والله لو قعدت تنادي عليه للصبح ما هييجي!

مؤنس فرحان said...

كل سنة وانت طيب يا عمروو
و بألف صحة و سلامة دايما يا رب
...................

من أيام أبونا آدم والناس حلوة و وحشة فى نفس الوقت
لكن شعورنا بحلاوتها و وحاشتها بييجي فى رأيى من الزحمة .. اننا بقينا كتير ومفيش وقت اننا نفكر او نلاقى عذر لكل واحد او نتناقش مع كل واحد فأصبحت الأحكام الجاهزة هى الحل وقوالب بنركبها على بعض
..............................
كاد أجن! لماذا تخسر كل هذه البطولات؟ بإمكانك تحقيق الفوز فيها بسهولة!
- خسرتُ بطولة العالم ، فماذا يضيرني أن أخسر بضع بطولات صغيرة؟!

----- حلوة أوى دى -----
................................

لمحات السجاير بردو بتعبر عن القوالب الجاهزة وحالة الشيزوفرينيا اللى الناس عايشة فيها
(أى واحد بدقن يبقى شيخ)..
(رغبتنا فى انتقاد الآخرين عشان نحس اننا كويسين وأحسن من غيرنا رغم بلاوينا)

.........................
بوست جميل يا عمروو

JuSt_hUmAn said...

مؤنس..
وأنت طيّب يا ريّس..ربنا يخليك
ما تحرمناش من بوستاتك وردودك (f)

Mai Kamel said...

انت جميل قوي
:D
سعيدة ان فيه زيك في الحياة بجد
لو كنت اعرفك كويس قوي يمكن كنت استوحيت منك شخصية بطل لرواية نفسي اكتبها
:)))

JuSt_hUmAn said...

مي..
ربنا يخلّيكي يارب..انبسطت بكلامك فعلاً
بس يا رب الرواية ما تبقاش كئيبة:d