Friday, September 11, 2009

انكسر جوّايا شيء:D

مبدأياً البوست دا ما هو إلّا هذيان وفضفضة فارغة يعني عشان أبقى قلت من الأول.
من شهرين كدا قررت إني أرجع ألعب كورة تاني، أنا كنت بلعب حلو زمان بس بطلت ألعب من بعد ما دخلت الجامعة، وفاكر لعبت مرتين تلاتة في خلال السنين اللي فاتت لكن كنت بلعب عشر دقايق وبعدها أترمي ع الأرض من التعب.
المهم قررت أرجع ألعب كورة تانية لأن لياقتي بقت في الضياع، أول مرة قدرت ألعب ساعتين متواصلتين لأن كنّا قليلين جداً وماكانش ينفع أسيب الناس وأبوّظ عليهم اللعب، ورجعت عضلات جسمي كلها واجعاني طبعاً لأني ما بمارسش أي نوع من أنواع الرياضة من قرون، إلا السباحة كل سنة مرة لمّا بسافر أصيّف. المهم المرتين اللّي بعد كدا كنت بلعب كل الوقت المتاح برضو وبرجع عضلاتي واجعاني، في المرة الرابعة رجعت عادي جداً ولياقتي حسيتها بترتفع وابتدى لعبي يبقى حلو.
المرة الخامسة كانت ليلة رمضان، لعبت أقل من عشر دقايق وبعدها مشط رجلي اتلوى تحتي وأخدت عليه خطوتين وباصيت الكورة وجاي بجري بعدها لقيت ألم بشع في رجلي. ما قدرتش أكمل بعدها، تاني يوم رحت عملت أشعة عشان أكتشف إن رجلي اتكسرت!
..
بسأل الدكتور أثناء ما بيجبّس رجلي.."أنت هتجبّس لحد فين؟" بضحكة غريبة جاوبني "لحد أعلى السمانة"، من جديد سألته.. "والجبس هياخد قد ايه؟"، بضحكة أوسع وأغرب-فيها قدر لا بأس به من الشماتة- جاوبني "شهر ع الأقل". كنت عاوز أسأله أنت فرحان فيّ كدا ليه؟:s
فاكر زمااااان رجلي يمين اتجبست برضو، ما كانتش اتكسرت كان فيه عضمتين بعدوا عن بعض بزيادة، المفروض إن العضمتين دول بيبقوا قريّبين من بعض وعلى سن البلوغ بيلضموا فبعض يبقوا عضمة واحدة، المهم إني كنت بلعب كورة واتخطبت فيها والعضمتين بعدوا عن بعض بزيادة. كان ساعتها عندي 8 سنين مثلاً، وكنت ببوّظ الجبس كل 3 أيام مثلاً وفي الأخر ما استحملتوش وشيلته ورفضت رفض قاطع إنّي أتجبس تاني. وفضلت رجلي توجعني من حين لآخر لحد كذا سنة بعد القصة دي.
..
فاكر لما اتجبست وأنا صغيّر كنت بكسّر الشمّاعات المعدن وأهرش بيها، دلوقتي اكتشفت إن دا هبل لا طائل منه، دلوقتي لمّا رجلي بتهرشني بتناسى الموضوع وبشغل دماغي بأي حاجة تانية، بعد دقيقتين مثلاً بيختفي شعور الرغبة في الهرش دا خالص.
..
معظم دكاترة العضم في مصر بهايم..دي حقيقة اقتنعت بيها بعد سماع خبرات الآخرين بالإضافة لخبراتي الشخصية، شويّة سبّاكين فعلاً مش دكاترة.
لكن الـ 3 دكاترة اللّي رحتلهم أجمعوا إن فيه تمزق شديد في أربطة قدمي، وإن التمزق دا هياخد وقت أطول من الكسر.. يلا خير خير.
..
صحابي بيقولولي إني سريع جداً وأنا بمشي بالعكازين، وزوف بيقترح إني أعمل بطولة العدو بالعكازين لأني أكيد هحتكرها!
افتكرت علي الحجار لمّا بيقول "عم بطاطا يزك الزكّة يعبر سينا ويفتح عكّا"
..
ليه المصريين مقتنعين إن الجبس عبارة عن كشكول أو أوتوجراف؟، كل ما أشوف حد من صحابي يقول لي عاوز أكتبلك ع الجبس!
فأرد إن الجبس لوحده شكله سيء، فليه أخلّيه أسوأ بخطّك؟
فكّرت إني أكتب عليه أبيات السيّاب اللّي فمطلع "سفر أيوب":
"لك الحمد مهما استطال البلاء ومهما استبد الألم
لك الحمد إن الرزايا عطاء وإن المصيبات بعض الكرم"
بعدها قلت لو السيّاب طلع من قبره وشافني كاتب أبياته دي عشان رجلي اتكسرت هيشتمني بأقذع الشتائم اللّي يعرفها، وهيبقى معاه حق الصراحة! الله يرحمه ويعوّضه خير في الآخرة.
..
الصلاة وأنا قاعد بحس مالهاش طعم، ما بعرفش أركز خالص وبسرح طول الوقت
وإنّي أستحمى وأنا قاعد شيء بشع، فضلاً عن الكيس البلاستيك اللّي ببقى لابسه في رجلي ومرعوب طول الوقت إني أتزحلق بسببه وعضمي كله يتكسّر بقى!
..
أنا بكره أطلب أي حاجة من أي حد، مهما كنت واخد على الحد دا ومهما كان قريّب مني، ومستحيل أطلب نفس الطلب من أي شخص مرتين.
طبعاً دلوقتي أنا قارف أمي اللّي بتعمل لي كل حاجة، وصحابي اللّي ما بخرجش بره البيت من غيرهم، يلّا الحمد لله وربنا يجازيهم خير.
..
الكلاب ما بتهوهوش عليّ خالص، ودا شيء غريب..مش عارف هل خايفين من العكّازين زي ما الناس بتقول، ولا دا موقف إنساني منهم!
..
كنت ناوي أعمل حاجات كتير في رمضان دا، خصوصاً إن الشغل بتاعي واقف اليومين دول والكورس كمان وقف في رمضان، بس جه الكسر دا دمّر كل مشاريعي، يلّا الحمد لله.
..
من أسبوعين كدا كنت واقف في الشارع مستني زوف اللّي راح يشوف فين العمارة اللي فيها الدكتور اللّي كنّا رايحينله، المهم كان فيه ولد صغيّر واقف مع مامته على مقربة مني، بصّلي كدا وقال لي: ايه دا؟ مين اللي ربطك كدا؟، ابتسمت وقلتله الدكتور. قال لي حرام عليه ربطك ليه؟!، ضحكت وقلتله عشان رجلي مكسورة. قال لي يعني كسرك وبعدها ربطك كمان عشان يتأكد إنك مش هتعرف تمشي!
طب ما تزعلش أنا هفكك! ضحكت جداً بعدها مامة الولد خلّصت اللّي كانت بتعمله وانتبهت له فقالتله بطّل لماضة وشدّته ومشيت.

4 comments:

Amr said...

ههههههههههه

أنا وقعت من الضحك على احتمال توقف الكلاب عن النباح بدافع الإنسانية
يمكن عشان ظهرك منحني فمش واقف منتصب زي بقيت الناس فالحيوان يفتكرك واخد وضع هجوم

JuSt_hUmAn said...

يمكن
بس احتمال دافع الإنسانية رومانسي أكتر

مُزمُز said...

عاجبني اوي الرغي الجميل اللي ملوش هدف ده تحفة بجد يعني أنا فرحان انك زيي بتخاف من الكلاب وفرحان انك بتحب السياب

الجزء الاخير بتاع الطفل الصغير ده تحححححححححفة فعلا انا ضحكت بشكل مش طبيعي والله الواد ده زي العسل وعبقري حقيقي

JuSt_hUmAn said...

:)
كل العباقرة بتخاف م الكلاب يا ريّس
:D