Friday, April 13, 2007

عالم وسخة!


حامد في تدوينته دي بيقول إننا شعب وسخ و في منتهى القذارة و ما نستحقش الديموقراطية..معاه تماماً..شعب خانع و خاضع و جبان و منافق.
من فترة كنت راكب تاكسي مع سواق في الأربعينات كدا..و الطريق كان زحمة جداً بشكل مستفز، فالسواق بيقول و ملامح قرف فظيعة باينة عليه:"الله يلعن أبو دي بلد،زحمة و مفيش فلوس و الواحد مش لاقي ياكل،و كل حاجة في البلد باظت خلاص."
قلتله بسخرية كدا البركة في مبارك !
لقيت الراجل ملامحه تغيرت 180 درجة من السخط و القرف الفظيع لرضا و إحترام ! و رد قال لي بالنص: "لأ معلش..سيادة الريس محمد حسني مبارك عامل شغل عالي قوي في البلد..ربنا يخليهولنا،بس احنا اللي شعب زبالة ما بيطمرش فينا حاجة!"
بصيت للراجل بذهول و قلتله بسخرية -شديدة الوضوح-:"احنا! دا احنا ولاد كلب على رأي عادل إمام!بنضايق الرؤسا و بنعكنن عليهم !"
لقيت الراجل بيقول لي اه :"و الله معاك حق يا ابني!"
طبعاً مستحيل الراجل يكون مقتنع باللّي قاله..و مستحيل يكون ما فهمش إني بتريق،طيب ليه قال كدا،و ليه أيد جملتي كإني كنت بقولها بجد؟
عشان احنا شعب وسخ زي ما حامد قال ! الراجل خايف مني! طب اسكت يا سيدي ما تنافقش كمان.
..
الشعب ما يستحقش الحرية عشان شعب خانع وجبان..ما يستحقش الديموقراطية عشان مش بس بيكتفي بخنوعه،دا بيهلّل للحاكم الفاسد كمان !
أنا مقتنع إن الشعوب بتستحق مصائرها،الحاكم فاسد؟..اخلعه !..لو ما خلعتوش يبقى أنت تستحقه !
الحقوق بتُنتزع مش بيُحصل عليها !،لو ما عندكش إستعداد تَنتزع حقك يبقى ما تستحقهوش !

6 comments:

Amr said...

زي بردو سواق البرنامج الوسخ اللي هطلع فيه قريب يمكن بكرة
بيقولي أنا مستنيك قدام صورة السيد الرئيس!!! طب مانت بتتكلم في التليفون يعني، ما تقول الريس ولا تقول مبارك ولا اي بتاع
السيد الرئيس ايه بس

zoof said...
This comment has been removed by the author.
zoof said...

منا مش فاضيلك بقى انت وحامد .. هجرى وراكوا فى المدونات ..
يا عالم يا هووو
الناس دى غلابه جدا .. عبقرية المصريين كلها اتجمعت فى الحكام .. وعرفوا يربوا الناس دى كلها على الخوف ..
الراجل ده بيتكلم ليه كده .. ميعرفش يقول غير كده .. مهو معرفش يعنى ايه حرية .. ويعنى ايه يختار .. هو اتولد طول عمره ملوش اختيار .. عايزه يختار دلوقتى ؟؟
ويقول ايوا ولا
الامل فى ولادنا يا ابنى .. الجيل ده كله فى الطراوة
ربى ابنك ازاى يبقى حر .. ايه صوت جدو اللى طلع ده :D
خليه يحب البلد دى

JuSt_hUmAn said...

زقزوق..
الناس بقت بتخاف تتكلم جواها حتى !
الخنوع بقى جوانا سواء فيه حد سامعنا أو مفيش :(
..
زوف..
أنا بتكلم على الوضع الحالي يا زوف..مش مهم ليه بقينا كدا،المهم إننا بقينا كدا !
بعدين أنا ما أنكرتش إن الناس غلابة..بس ماداموا غلابة و مش عارفين يختاروا يبقى ما يستحقوش الحرية فعلاً !

mor-el-kalam said...

يا ابني حرية ايه اللي بتتكلموا عنها و هو انتوا عرفتوا معناها الاول علشان تطلبوها .
النفاق بقي هو الاساس في البلد دي
علشان ما نعلا و نعلا و نعلا لازم نطاطي نطاطي نطاطي .
يعني نبقي زي سيد خميس كده ولا انا غلطان يا عم فراس .
مبروك يا عم علي الجيد
النتيجه طلعت مبروك

JuSt_hUmAn said...

مونتي..
فعلاً النفاق هو الأساس :(
بس على رأي سيد عيسى يا مونتي" ادينا طاطينا لحد ما ....... و ما بنعلاش برضو!"
..
تسلم يا مونتي ع النتيجة..بتفائل بك أنت و حامد دايماً لما بتجيبولي النتيجة.
الله يبارك فيك..و مبروك لك أنت كمان.
(f)