شخابيط !
لخابيط..لخابيط..لخابيط جوايا حبّة شخابيط
أفكار بتزق الحيطة
و هموم تطلع في الزيطة
و هموم تطلع في الزيطة
..
جوايا أحلام ورديّة
مساكين بتعافر فيّ
عايش فلسفة وهميّة
حب و عدل و حرية !
..
حب و عدل و حرية !
..
جوايا حنيّة خفيّة
مكبوتة و متداريّة
شايلة هم البشريّة
ظلم و كره و أنانيّة !
..
..
جوايا إنسان مجنون
ناوي يغيّر في الكون
حالف ما هييجي بكرة
من غير الحب قانون
..
راسم صورة خياليّة
للدنيا و هيّ عفيّة
لا الكدب بقاله مكان
و الشر اهو ولّى و كان
أما حتة أمنية !!
2005
عمرو النحراوي
10 comments:
أما حتة أمنية
أما حتة قصيدة
بس مش كتير تشيل هم البشرية لوحدك
ربنا يوفقك
نفسى فيها ديه
بجد
حستها أوى
كلها على بعضها جميلة
..
جوايا إنسان مجنون
ناوي يغيّر في الكون
حالف ما هييجي بكرة
من غير الحب قانون
..
عمرك ما تبطل تتمنى....
عاجبانى
والسطر ده
عايش فلسفة وهمية حب وعدل وحرية
معلق معايا من أول ماجيت المدونة
حلو أوى
...
بقولك ياعمرو لو الغنوة اللى تحت موجودة ف مكان تانى عالنت ابقى قوللى فين
عشان كلماتها جامدة وعاجبانى و جهازى الله يسامحة مبينزلش من فور شيرد
بس خلاص
مصطفى..
سعيد بزيارتك للبلوج و سعيد أكتر إن القصيدة عجبتك.
القصيدة دي كاتبها في 2005..دلوقتي الواحد مش عارف يشيل همّه لوحده أصلاً !
..
just me..
مبسوط إن القصيدة عجبتك و حسيتيها..و سعيد بزيارتك للبلوج.
..
Yotta..
أنا كمان دا أكتر سطر بحبه في القصيدة
..
بالنسبة للأغنية رفعتها على الرابيد شير لو ما نزلتش قوليلي و هرفعها على أي ايميل و اكتب اليوزر نيم و الباصوورد بتوعه.
http://rs291.rapidshare.com/files/71335421/Jacques_Brel_-_Ne_me_quitte_pas.mp3
نورتي البلوج.
فكرتني بأحلام المراهقة
او بهلوسة بعد البكا
مجرد أحلام...عمرها ما بتتحقق
بس بتفضل احلام
نكتبها على ورق
ونقفل عليها
ونبقى نقول كان نفسي وكان حلمي
جميلة اوي التدوينة
عمرو
..
شكراً كتير والله
نزلتها اخيرا من فور شيرد
وكله تمام
الغنوة تحفة ولحنها حلو أوى
t
h
a
n
x
:)
و حياة ربنا ما عارف اقولك ايه
من ساعة ما كتبتها و شوفتها فى جزء إستحالة انساه
عايش فلسفة وهميّة
حب و عدل و حرية !
اقولك ايه يخرب بيتك و تسلم إيدك يا عمور
..سمكة
أحياناً القدرة على الحلم بس بتبقى كفاية!
نوّرتي البلوج
..
..Yotta
جميل إنك عرفتي تنّزلي الأغنية و عجبتك
و مفيش داعي للشكر من أساسه
..
..عطشان
الله يخلّيك يا ريّس..تعيش و تحب اللّي بكتبه يا رب
من أجمل الحاجات اللى قرتهالك أو تقريبا قريتها لحد يا عمرو
فعلا .
over the moon
...
:)
تحياتى
مبسوط إنها عجبتك يا مها..
نورتي البلوج : )
Post a Comment