Thursday, April 03, 2008

في عيد ميلاد البلوج...


النهاردة يبقى فات سنة على أول بوست في المدونة..الناس عادة بتقول ياااه فات سنة؟ قوام كدا؟
لكن أنا مندهش إن كل دا مافاتش غير سنة واحدة بس!..باستثناء أول كام شهر في السنة دي، كانت طويلة جداً والوقت بيتحرك برتابة ورخامة مش طبيعية!
كنت عملت account على الblogger من فترة كبيرة..تحديداً مارس 2006..لكن ساعتها كنت عملت الaccount مجاملة لأحد الأصدقاء بعد إلحاح شديد منه إني أعمل بلوج..لكن ما ماكانتش عندي النيّة إني أعمل بلوج فعلاً.
يوم 2 ابريل 2007 سبت المنتدى اللّي كنت عملته مع ناس أصحابي..و ساعتها حسّيت برغبة ملّحة إن يبقالي مكان تاني أكتب فيه.
المنتدى دا بقاله موجود دلوقتي قرابة ال3 سنوات..و فيه ذكريات صعب الواحد ينساها...
من 3 سنين وشويّة كلّمت صديق و اقترحت عليه فكرة إنشاء منتدى -عشان المنتدى اللّي كنا بنكتب فيه اتقفل- والواحد طفح الكوتة لحد ما عمله..مش هنسى مثلاً لمّا الناس اتصلت بيّ الساعة 2 الفجر عشان أدخل ع النت عشان كان فيه عرض ما لسيرفر و عاوزينني أدخل ع النت لأن كلهم مجتمعين عشان نختار domain name للمنتدى،
ساعتها ما كانش عندي كمبيوتر في البيت أصلاً و نزلت جري في عز البرد رحت السايبر عشان نلحق العرض!
مش هنسى برضو يوم ما قعدنا أنا وواحد صاحبي على قهوة في وسط البلد عشان نعمل تقسيمة مبدأية لأقسام المنتدى و أساميهم و تعريفاتهم..ويومها كتبنا قسم او اتنين و قعدنا بقية اليوم نكتب رباعيات هجائيّة على بقية مؤسسي المنتدى كنوع من التهريج.و كتبنا رباعيات هجائية تانية لاذعة على بعض الأشخاص اللّي بنحتقرهم،ووصفنا خناقة حصلت قدامنا و احنا قاعدين ع القهوة.
وفيوم تاني كنا متفقين نتقابل كلّنا (مؤسسي المنتدى يعني) عشان نتفق على بعض الخطوط العريضة للمنتدى..يومها وصلنا أنا وصاحبي دا بدري شوية..وقعدنا نتخانق على مين أحلى ممثلّة..هوّ شايف سلمى حايك و أنا شايف كاثرين زينا جونز!
ولمّا كان بييجي الساعة 3 و 4 الفجر يقعد معايا في السايبر اللي بقعد فيها و نقعد نتّفق على حاجات تخص المنتدى ونجمّع ايميلات للدعاية و بعدين ناكل و نروح نشيّش ونرجع نلعب فيفا.
ولّا حامد اللّي كان بيجيلنا من شبين الكوم عشان نظبّط أمور المنتدى سوا.
بس على قد ما تعبت في المنتدى دا، على قد ما أنا سعيد جداً و فخور بقراري بترك المنتدى بلا رجعة لمّا حسّيت إني مش راضي عن التصرّفات غير الأخلاقية اللّي حصلت فيه، احترمت نفسي قوي لمّا تخلّيت عن حلم جميل كان عندي لمّا لقيته بقى كابوس لا يستحق العناء فيه..وإنّي لو استمرّيت ما كنتش هحترم نفسي.
وفنفس الوقت حافظت على علاقتي بأصحابي اللّي عملت معاهم المنتدى دا.
أرجع تاني للبلوج... و أحب أشكر أشرف جودت جداً لأنّي طلّعت عينيه في تظبيط البلوج معايا..واداني كتير من وقته عشان يظبّط اتجاه اللغة و يحوّله من اتجاه الحروف الانجليزي لاتجاه الحروف العربي..و تعبته عشان يعرف يخلّيني أكتب في البلوج بخط Tahomaوغيّرنا الثيم بتاع البلوج كذا مرة ولعبنا في ألوانة 100 مرة لحد ما رضيت عن الشكل الحالي..يمكن شكر متأخّر قوي لكن عموماً أشرف ماكانش مستنّيه.
أول ما عملت البلوج ما كنتش عارف بالظبط هكتب فيه ايه، بس حسّيت إني محتاج مساحة أقدر أتكلم فيها براحتي وخلاص..و توقّعت إني هكتب فيه كام بوست بعدين أهجره..لكن اديني بعد سنة اهو لسّه بكتب فيه!.. صحيت انقطعت كذا مرة لكن كل مرة كنت برجع أكتب برضو.
وجمال البلوج عن المنتديات إن الواحد بيبقى بحريّته أكتر في البلوج..وممكن يكتب أي كلام فارغ لمجرّد إنه عاوز يكتبه.
:Dولسّه ياما هيستحمل:Dالبلوج دا ياما أستحمل كآبة و بؤس من الواحد
..لدرجة إن "عطشان" قال لي إن فيه حد قال له أنا كل ما بدخل بلوج عمرو بكتئب..فسأله طب بتدخله ليه؟! قال له عشان عاوز أكتئب!
عموماً أكيد البلوج هيستحملني..أنا اللّي عملته وقدره بقى إنه بلوج واحد مكتئب!..بعدين أنا لمّا ببقى مبسوط بشاركه انبساطي برضو!
كل سنة و أنتي عايشة وأنا بكتب فيكي يا مدوّنتـ(ـي) العزيزة!


***
دا حوار دار بيني و بين عمرو فهمي(زقزوق) على الماسنجر..الحوار بيعبّر عن كلام بيدور جوّايا بقاله فترة و حسيت إن من الأفضل أنشر الحوار بدل ما أكتب الكلام تاني..استأذنت عمرو و ادي الحوار...اه بالمناسبة كلب البحر هوّ تعبير اعتادنا نطلقه أنا وزقزوق على الشخصيات الحقيرة أو اللّي بنتقزز منها!




عمرو عصام: الواحد قرب يقتنع إن هوّ اللّي كلب بحر!
عمرو فهمي: ؟
عمرو عصام: والله بجد،جاتنا نيلة،قاعدين نتريق على الناس و نقول دا كلب بحر و دا ابن ****** و دا مش عارف ايه،و احنا الخاسرين!
عمرو فهمي: هههههههههههههههه
عمرو عصام: من امتى الخاسر بيكتب التاريخ؟
عمرو فهمي: لسه جيهان قايلة لي،المنتصر يكتب التاريخ، بس قالت لي ده على اساس اننا المفروض نقرا التاريخ الحقيقي اللي كتبه الخاسر
عمرو عصام: لازم نعترف..احنا اللي كلاب بحر يا عمرو!
عمرو فهمي: تاريخ المنتصر فيه زيف كبير، واللي هيقراه وهو مغمض يبقى ** *** الصراحة
عمرو عصام: اه بس تاريخ الفائزين هنا يستحق القراءة،ليه كلب بحر زيّك ولّا زيي يكتب التاريخ و يخنق ع الناس بفلسفته العقيمة اللّي ما حققتلوش غير الخسارة؟!
عمرو فهمي: :d عشان بنبيع
عمرو عصام: بنبيع ازاي؟، بنحقق مبيعات يعني؟
عمرو فهمي: اه، الناس عايزة ده، مضربناش حد على ايده، وقلناله اقرا يا ** ***
عمرو عصام: عشان الناس بتقرا تاريخنا كتسلية..لكن من جوّاهم عارفين إننا كلاب بحر خاسرين!
عمرو فهمي: وهما ولاد ****** رأيهم ميلزمنيش، خليني اعمل قرشين منهم وابيع لهم
عمرو عصام: لا تأخذ نصيحتك من خاسر! ليه مصرّين نكتب أفكارنا؟! عشان نوكس بقية الناس معانا؟!، الواحد فقد إيمانه بنفسه خلاص!
عمرو فهمي: صب لي كاس يا شهدي:d
عمرو عصام: هههههههههههههه، بمناسبة نجيب بقى..
"لا شيء بعد الأفق يا ملّاح غير الأفق..كل الكون بحر!"
عمرو عصام: عارف..فمرة واحد بيقول لنجيب أنت بتشرب كتير قوي،قال له عشان أنسى!، قال له تنسى ايه؟،قال له و أنت شايفني فاكر؟!
عمرو فهمي: :d

(النجوم الموجودة في المحادثة دي كان مكانها شتيمة..ونجيب اللّي اتكلمنا عليه هوّ نجيب سرور طبعاً..وشهدي دا ابنه، وبيت الشعر المكتوب من قصيدة "لزوم ما يلزم" لنجيب)


***
فيه لعبة بلعبها اونلاين على النت بقالي سنتين و نص تقريباً..اسمها Medal of Honor..اتعرفت منها على ناس كتير قوي من جنسيات مختلفة..وانضمّيت لفريق فرنساوي فيها من حوالي سنتين.
من كام يوم قررنا نحل الفريق وندّي الفترة الباقية في السيرفر لفريق فرنساوي تاني أصحابنا..بدل ما فلوس إيجار السيرفر تضيع و ماحدّش بيستعمل السيرفر.
يومها اكتئبت جداً..أولاً عشان حاجة بحبّها راحت..و ثانياً عشان ناس كنت بحبهم جداً (رغم إنّي ما أعرفش حاجة عنهم تقريباً) مش هعرف أي أخبار عنهم و علاقتي بيهم هتتقطع!

أما السبب الأهم إنّي تخيّلت إن ناس ما أعرفهمش قوي و ماشفتهمش حتى و زعلان و متضايق جداً إني مش هشوفهم في اللعبة تاني ولا هعرف أخبارهم..ما بالك بقى بأهم إنسان عندك في الدنيا!
تخيل إن ممكن الإنسان دا يتعب قوي أو يجراله حاجة -لا قدّر الله- وأنت ما تعرفش!
تخيّل إن ممكن يبقى الإنسان دا حزين جداً و أنت ما تعرفش ولا تعرف تساعده و تخفّف عنّه!
تخيّل إن لمّا حد عزيز عليه يموت مش هتعرف ولا هتعرف تعزّيه وتشد من أزره!
تخيّل إنك مش هتعرف تفرح لفرحته!..ولا هتعرف إنجازاته وتفخر بيه!
حتى يوم ما تموت مش هيبقى جنبك! ويوم ما هوّ يموت مش هتعرف حتى!!!!
ممكن يكون أخر شخص ييجي فبالك وأنت فلحظات الاحتضار..أو زي ما ناظم حكمت بيقول :
" وفي مغيب آخر أيام عمري..
سوف أراك،وأرى أصدقائي،
ولن أحمل معي تحت الثرى غير حسرة الأغنية...
التي لم تتم!"

--------------------------------------------------------------------------------------
على الهامش: البوست طويل جداً، وتقريباً مفيهوش غير كلام شخصي أضعت وقت القارئ فيه، بس عذري إن النهاردة ذكرى إنشاء البلوج فمن حقي أرغي وأهرتل و أستعيد بعض ذكرياتي.
دي أغنية يا اللّي فؤادك بتاعة فريق بلاك تيما..الأغنية كان "عطشان" بعتهالي، ومن أوّل ما تسمعها تكتشف سذاجة الملّحن..الكلمات جميلة جداً و اللحن برضو جميل جداً..لكن فيه مشكلة فظيعة في الأغنية إن اللحن مرح جداً والكلمات كئيبة جداً!!

لكن بعد ما سمعت الأغنية كتير جداً بقى اللحن كمان بيكئبني!..بقيت أحس إن مرح اللحن دا بيمثّل مرح ما كان!

11 comments:

مؤنس فرحان said...

كل سنة وانت طيب يا عمرو
مدونتك جزء منك .. ولازم تحتفل بيها زى عيد ميلادك بالظبط
.....

ماتتضايقش من موضوع المنتدى .. كل كلمة او علاقة او لحظة حلوة استمتعت بيها او استفدت بيها على منتدى او شات او مدونة هى كنز موش بيضيع
لأنها ببتتسجل عندك انت فى ذكرياتك حتى لو نسيتها بعد كده .. بس هى موجودة وانت الكسبان

كل لحظة بتمر علينا سواء سعيدة او حزينة او حتى مالهاش طعم هى طوبة بتتبنى فينا .. انا عبارة عن مبنى مكون من كل لحظات عمرى حتى الآن.. المهم منها والهايف
.............

لما اتكلمت عن الجيمز .. فكرتنى بحاجات كتير
انا كنت .. لا لا مازلت متيم بلعبة فيفا 98 (حتقول عليا عجوز اوى) بس بجد الفيرجن دا الوحيد اللى لسه متبت فيه لحد دلوقتى
FiFa 98
Star Craft
Age of Empire
Red Alert
F22 Raptor

الألعاب دى ياما أخدت مننا ليالى .. والشعور اللى حسيته مع زمايلك فى التيم شعور حقيقى
انت عارف .. لما يبقى فى انسان او مجموعة اشخاص بيشاركوك نفس لحظات المشاعر والمتعة .. بيعملو رفقة كده زى رفقة الخاتم
رفقة ميدال اوف هونور
او رفقة فيفا 98

ممكن نكون شخصيات مختلفة عن بعض لكن جمعنا حبنا واستمتاعنا لنشاط ما ايا كان
وبيفضل ليهم قدر ومكان فى قلبنا وذكرياتنا
.........

ربنا يكرمك ويسعدك دايما وعقبال ماتحتفل بعيد المدونة الخامس ومن بعده العاشر .. وماتقلقش موش بعيد ولا حاجة .. الأيام دلوقتى بتعدى بسرعة الضوء

ٍSOU said...

اة البوست طويل لكن انت ماضيعتش وقت القارئ لانك بتتكلم عن ذكريات عدت عليك الذكريات دى بتوصف ملايين غيرك دة غير اهنا ممكن تعلم الواحد حاجة..
عارف بئة بالنسبة للحن المرح اللى انت بقيت تشوفة كئيب ..انا شخصيا كان فى تراك لعمر فاروق انا كنت بكرة مووووت لانة كان حزين برخامة و فى احد الايام اتصدمت صدمة متهيالى ماتصدمتش زيها قبل كدة و تخيل ان التراك اللى انا بكره دة هو الوحيد اللى فضلت اسمع فية اليوم كلة ,تخلص و اعيدها تانى..و مش حاسة اانها حزينة اد مانا حاسة انها بتطبطب على و تمسح دمعتى

كل سنه و البلوج و صاحب البلوج بخير

Amr Fahmy said...

تخيّل إن لمّا حد عزيز عليه يموت مش هتعرف ولا هتعرف تعزّيه وتشد من أزره!

مطلبش العزا يوم ما اللي قال عليه "أعز الناس" مات، ويا ريته مات لوحده، هو اللي قتله

YOTTA said...

طب دى فرصة كويسة اقول فيها للبلوج ده انى بحب اطل عليه دايماً.. وكل سنه وهو طيب..
وانت كمان طيب -لعلك كده يعنى- ا
وتيجى ترغى فيه دايماً
تقول كلام مهم او مش مهم
كئيب او مش كئيب..
له معنى او حتى مالوش..

المهم انك بتقول
.

JuSt_hUmAn said...

مؤنس..
وأنت طيب يا جميل..الفكرة إني ما بحتفلش بيوم ميلادي وما بقولش عليه عيد كمان:d
بس قلت أدلّع البلوج شوية بقى.
بالنسبة للمنتدى فالمحزن في الأمر إن كل حاجة الواحد ابتداها باظت:d
بس ما بقيتش بزعل..اشمعنى المنتدى هيكمل يعني؟!
بالنسبة للجيمز بقى فأنا بحب ريد اليرت جداً..ورغم إني ماليش في الفيفا بس أكتر فيرجنين بحبهم فيها 98 و 2002
وكمان بحب قوي age of empire..لكن ما شفتش star carf ولا f22 قبل كدا.
بالنسبة بقى للL.F.D فغير كدا كنا زي أسرة واحدة..ورغم إن معظم الفريق في الأول كانوا فرنساويين وماكنش فيهم غير بنتين بس بيعرفوا انجليزي لكن حتى الباقيين كنا بنتواصل برضو بالفرنساوي المكسّر بتاعي وكانوا بيحفظوا جمل انجليزي عشان يسلموا عليّ بيها!
دا غير لما كنا بنتكلم كلنا على المايك ونقعد نرخم ونضحك على نطق بعض..واللّي يغنّي واللّي يقول wooohooo
فعلاً مبسوط قوي بردك يا مؤنس..ربنا يكرمك يا رب (f)
..
Sou..
فاهم إحساسك بمقطوعة عمر فاروق..وأنتي بخير يا رب..
..
زقزوق..
: )
..
يوتّا..
ربنا يكرمك..وأنتي طيّبة..و فعلاً المهم إن الواحد بيفضفض وخلاص.

بيقولوا سايكو said...

كل سنة و أنت طيب و البلوج طيب و عقبال كده ما يبقى بلوج سعيد ... و بيتهيئلى بقى لازم أشكرك لإنك انت اللى خليت أشرف يظبط البلوج بتاعى من غير ما أقوله ... بالنسبة للبلوج بتاعك و الكآبة فده أمر وواقع أنا استحالة أكدب أو أجمَل الموضوع .. و مش مجرد كآبة لأ دى زايدة شوية اتنين تلاتة قول عشرة .. بس باحب آجى هنا رغم إنى باكتئب أوى و أنا فى عز انبساطى .. يمكن لإنك بتكتب بإحساس أوى .. و يمكن كمان بآجى على أمل إنك زى ما بتكئبنى احتمال وارد إنك تفرحنى و تكتب بإحساس برضه .. بس سيبك البلوج هيستحمل طبعا ... ما هو أساسا معمول علشان نطلع كآبتنا و غمنا فيه .. بس ممكن كل فين و فين نبسطه ببوست لظيظ

بيقولوا سايكو said...

استنى استنى .. انت بتقول تصرفات غير أخلاقية ؟ .. ألحق نفسى يعنى :) .. أنا تقريبا سألت طوب الأرض عن سر اختفاء حامد و عمرو .. و ماحدش كان بيعبرنى و الحمد لله ... أقولك على حاجة و أمرى لله .. المنتدى ما بقاش زى زمان من ساعة ماالناس المهمة اللى فيه بدأت تسيبه ... أنا ماعرفش طبعا مين غير أخلاقية دى ... بس أنا كنت باحبه أوى .. و دلوقتى باحبه بس و انا حطة قدامى صورته القديمة .. لو قادر تفهمنى

رغاية أنا بس مش مهم :)

عامة كل سنة و انت طيب يا بلوج

JuSt_hUmAn said...

آيات..
بالنسبة للمنتدى فأنا عمري ما اتكلّمت عن سبب تركي له..يمكن دي أول مرة أجيب سيرة المنتدى مع حد غير صديقين أو تلاتة مقرّبين..ومفيش كارثة حصلت في المنتدى يعني..مش عاوز أكبّر الموضوع..كل ما في الأمر إني بشوف إن فيه مبادئ أخلاقية معيّنة شديدة الأهمية..فلمّا شفتها بتُنتهك فضّلت إني أمشي بهدوء.
مبسوط بتعليقك يا آيات،ووأنتي طيّبة.

عطشان said...

تشى عمرو
انا مش عارف اقولك المدونة كئيبة اد ايه بس بصراحة الكأبة اللى فيها عالية اوى و انا ساعت بتمزج لما بكتئب عندك
احنا مش كلاب بحر احنا بنبقى فى اوقات كلاب بحر إنما على طول كلب بحر اعوذ بالله انا انتحر

بس بجد مدونتك جامدة جداً انا
نفسى تححققلى امنيتى :d

تعيش و انت معانا و مع مدونتك (f)

مــهــا said...

يااه ؟ سنة ! اه فعلا ماحستش بيها خالص يا عمرو ..

1-المنتدى ده عزيز على قلبى أوى ..حتى لو وصل للحالة اللى هو فيها دلوقتى , أنا كنت من أشبال نورماندى تقريبا يعنى من بتاع 6 سنين و أنا فيه ..عامة أنا كمان حسيت ان فى حاجات كتير مش متظبطة هناك علشان كده بهدوء انسحب من الإشراف ..

2-كل سنة و مدونتك طيبة ..أنا بحب المكان ده على فكرة ..مش عارفة اشمعنى فى أعياد الميلاد لازم الواحد يكشف حقيقة مشاعره ناحية الحاجات اللى بيحبها ؟ المهم .. ربنا يخليلك مدونتك كده و تعيش وتكئبنا و تعيش وتفرحنا بحاجات صغيرة ..و تعيش و نشوفك مرة أو مرتين فرحان فيها ..
فرحان باللى بتتمناه و عايزه
...
3- و على رأى عطشان , إحنا لو طلعنا إحنا اللى كلاب بحر فى الاخر ..يبقى ننتحر يا فندم

4- طبعا صاحبك بتاع سلمى حايك هو أحمد أوديب ,مش عارفة بصراحة ..الإتنين أحلى من بعض بس يمكن سلمى كده تحسها جذابة أكتر ..يمكن


5- أغانى كتير لمحمد محيى بتبقى لحنها عادى و مبهج .. و بتصيبنى بحزن و كآبة ..زى أغنية حلوة الحياة و باسمك حبيبى ..الحاجات دى بتخلينى أدمعّ مع إنه لا هو زعلان و لا اللحن حزين ..بس يمكن صوت محيى اللى كله شجن ده

:) عقبال سنين تانية قدام جاية يا عمرو و أنت بتكتب هنا

JuSt_hUmAn said...

الأول أنا آسف جداً إني ما ردّيتش غير دلوقتي بس ماكنتش قادر أرد بجد.
..
عطشان..
فيه أربع طلبات ياريت تنفذها في القريب العاجل..تبطّل تقول لي تشي،وتبطّل تطالبني بأمنيتك دي يا خويا،و تغيّر اسم اللينك اللّي حاططهولي في مدونتك (صدقني كلمة الجاحد دي هجاء مش مديح)،وتبطل مازوخية وحب في الاكتئاب!
كل سنة وأنت طيّب يا ريّس.
..
مها..
أنا كنت في المنتدى الأولاني من بعد ما فتح بشهرين،وحضرت أول لقاء للمنتدى..بس بشكل شخصي مش حاسس بافتقاد له يعني، ويكفيني إني طلعت منه بصداقات شديدة الروعة.
نقطة مين كلب بحر هيبقى عليها اختلاف كبير حسب رؤية كل واحد، بس اللّي يهمّني إني مش هتحط مع الطرف دا في سلّة واحدة.
وأنتي طيبة يا مها ومبسوط فعلاً إنك بتحبّي المدوّنة.