Monday, April 07, 2008

فضفضة

بيقال فيه كذا واحد ماتوا امبارح في المحلة..من ضمنهم طفل كمان:(
غير الناس اللّي اتصابت واللّي عينيهم راحت والناس اللّي اعتقلت..حسبي الله ونعم الوكيل.
ما أنكرش إني مبسوط باستجابة جزء لا بأس به من الناس امبارح..
والناس دي ما ماتش هدر يعني ولا اتبهدلوا كدا ببلاش..لازم نفتكر دا على طول..بس برضو مخنوق وزعلان جداً على الناس دي.
..
امبارح في المظاهرة اللّي كانت في نقابة المحاميين شفت منظر جميل قوي..كان فيه ست كبيرة سنها يمكن أكتر من 65 سنة..شكلها زي جدّة أي حد فينا..لابسة العباية والحجاب بتوع الناس الكبار وشكلها بريء وغلبان جداً ولابسة يافطة مكتوب عليها لا لمبارك.
فيه حاجة كمان نسيت أذكرها..إن عدد البنات كان كبير وأعتقد إن عددهم كان أكتر من الولاد كمان!
استغربت قوي من الموضوع دا بس فرحت بيه.
..
فيه دعوة ظريفة شفتها امبارح في الفيس بوك إن كلنا نصوم يوم الخميس 17 ابريل و ندعي عند الإفطار على مبارك وعلى الحكومة!
دعوة لصيام يوم الخميس 17 ابريل والدعاء على الحكومة وعلى كل ظالم من المسؤولين في هذا البلد والذين تسببوا في جوعنا وفي تخلف شعوبنا دعوة للجميع في هذا اليوم بأن يصوم ويدعو عند إفطاره على الحكومة وعلى كل ظالم يظلم من هو أضعف منه ندعو على كل من تسبب في تخلفنا وجوع الشعب فكما أن للصائم دعوة مستجابة فإنا نجعلها للمساهمة في إنكار المنكر في بلدنا وفي الإبتهال إلى الله بأن يرفع عنا غضبه وأن يرزقنا بمسؤولين عندهم ضمير بمسؤولين يخافون الله بمسؤولين يتقون الله فينا بمسؤولين يقودون بلادنا إلى التطور والنمو وإلى تحرير فلسطين بمسؤولين يكرمنا الله بسببهم لا بمسؤولين يجلبون علينا غضب الله ويظلموننا ويضطهدوننا ويجوعوننا ترى ماذا سيكون شعور الظالمين في الحزب الوطني والوزراء حين يعلمون أن الشعب كله يدعو عليهم في هذا اليوم ماذا سيكون شعور المحتكرين وهم يعلمون أن الشعب بكامله يدعو عليهم جبار قوي يمهل الظالم ولا يهمله ماذا سيكون شعور من يجادلون ويمررون القوانين في مجلس الشعب لإذلال الشعب وظلمه حين يعلمون أن 70 مليونا يدعو عليهم.
الفكرة ظريفة..وإن كان مش هيبقى فيه 70 مليون بيدعوا على الحكومة يعني.
وياريت مايجيش حد يقول لي هندعي على الحاكم والحكومة الفاسدة وبس؟..لا مش وبس، أي حاجة كويّسة تتعمل يعني..لمّا يبقى فيه إضراب الناس تضرب، يبقى فيه مظاهرة الناس تطلع،ومافيش مانع يوم زي دا نصومه وندعي عليهم.
وياريت كمان ما يجيش واحد سلفي يقول لي هتدعي على ولي الأمر!! طب ادعيله بالهداية يا أخي!
لا مش هدعيله بالهداية، هدعي ربنا ياخد أجله!
(يا ريت أي حد مقتنع بالفكرة يحط تنويه صغير في أي بوست في مدونته،و يقول لزمايله وأصحابه وأهله على الفكرة.)
..
دي مقتطفات متفرّقة لنجيب سرور..

اقرأ يا شيخ قفاعة
جرنان آخر سـاعة
شوف الدوله الشماعة
فاتحة للموت دكاكين
مليانة معتقلين
بتسمّيهم مجانين
شوف العلما المساجين
وعباقرة ومدفونين
والشعرا المدبوحين
وألوف الفنانين
وولادنا المخطوفين
فى السجن بنات وبنين
واتفرج ع الزنازين
عمال على فلّاحين
ماتقولـش علب سردين!
..
والشعب غنم متباعة
بالراس ولا فيها شفاعة
والخطف علينا مقاولة
والقبض علينا مقاولة
والقتل علينا مقاولة
وعصابة واسمها دولة
..
قول ع الهرم مواويل .. يا شعب يا قوّيل
خلّي التاريخ يحكي .. ع الشاكي والمشكي

الله يا شعب الله .. يا شعب دينه حياة
يا أرض مالها مثيل .. يا وهبة جابها النيل

يمين يا مصر يمين .. بالطين وغالي الطين
ما تعتّبك أقدام .. إلاَّ بخير وسـلام

وإن عتّبك طاغي .. دوري على الباغي
وإن عتّبك مغرور .. العقبى ع اللي يجور

وإن عتّبك طمعان .. ما يلاقي فيكي أمان
وإن عتّبك ملعون .. لو حتّى نابليون

والتين والزيتون .. والتين والزيتون
لا تولعي يا مصر .. ويكون ترابك جمر

ومصر هيّ مصر .. والوعد هوّ النصر
وتعالوا يا ولادنا .. واتوصّوا ببلدنا

وزي نن العين .. صونوها بين جفنين
يا شعب يا معلم .. يا ساكت اتكلم
***
ودي حاجة كان كاتبها خالد الصاوي

هييجي يوم والحب يكبر في الفؤاد
ويمد قدّامه الطرق..وينوّر السكك البعاد
ما يحده سور..ولا الكلاب ولا النمور
ولا الحرس والكشّافات والكلّابات
هييجي يوم ويتولد عمري اللّي فات
..
هييجي يوم مهما يطول الإنتظار
والحب يقدر ع الجدار
ويطل من طاقته الجميع
يتهد سور الانتظار
فوق الوحوش الشرّانية
تدبل على الدم الشظيّة
ويولّد الحب انفجار
هييجي يوم ويولّد الحب انفجار!

14 comments:

Anonymous said...

حسبى الله و نعم الوكيل ..بس اشمعنى المحلة اللى بيحصل فيها كل ده ؟
سمعت إمبارح من عمرو أديب ان دايما إعتراضاتهم و إضراباتهم مابتبقاش لذيذة ..مش بمعنى إنهم الغلطانين ..قصده يعنى يحذر الحكومة من غضبهم ..

....
بالمناسبة ..من خلال معرفتى الضيقة ببعض السلفيين ..فأظن - فى مصر بالذات- بطلوا حكاية ولى الأمر دى ..بقوا يدعوا عليه هو كمان !!
عجبانى فكرة الصيام والدعاء على فكرة ..بإذن الله ربنا يقدرنى و أعملها ..
...

JuSt_hUmAn said...

مها..
لإن الإضراب في الأساس بتاع عمّال المحلة عشان الأجور المتدنّية..وكان عددهم كبير جداً، البعض بيقول وصلوا ل7آلاف واحد..وخرجوا للشارع..وقوات الأمن حدفتهم بالقنابل المسيلة للدموع وبيقال ضربوهم بالرصاص المطّاطي كمان.
بعدين دا مش أول إضراب يحصل في المحلة، كل ما المحاولات بتتكرّر بتبقى المحاولة اللّي بعدها أكثر قوّة.

Known as PHYSCO said...

أنا اتضايقت من ساعة ما قريت إن حصل اشتباك جامد هناك و عملوا حرايق و اطلقوا عليهم رصاص حى و مش عافة كام واحد مات و المصابين قد إيه .. يعنى على قد ما أنا فرحانة إن فى مظاهرة و إضراب و الناس خرجت .. بس أنا عارفة وواثقة إن الإضراب ده مش هيحل حاجة .. مش تشاؤم بس حقيقة .. ده مجرد خطوة صغيرة فى وسط خطوات جاية كتير .. يبقى اللى بيحصله حاجة دلوقتى باحس إنه راح بلاش و مش قادرة أغير إحساسى ده .. لإن أكيد مفيش حاجة هتتغير دلوقتى و كل اللى بيحصل دلوقتى ده مجرد تمهيد

مش فاكرة قريت عند مين بالظبط إن أحلى حاجة فى الإضراب ده " يمكن عند أحمد الصباغ مش فاكرة و الله " إن الفكرة مش منظمها حزب و لا مجموعة .. ده الشعب هو اللى قرر و الشعب هو اللى نفذ .. لما فكرت فيها لقيتها فعلا حاجة كويسة .. يمكن تكون أحسن حاجة ... حلوة حكاية صيام يوم الخميس ده بس يارب أفتكر

YOTTA said...

الناس مش فاهمة يعنى ايه اضراب
وافتكروها حرب
وهاصو ف الهيصة وبوظو الدنيا
الله يهديهم بقى

JuSt_hUmAn said...

آيات..
مفيش حد بيروح هدر..لو الخطوات دي ما حصلتش الخطوات الكبيرة مش هتحصل برضو..أهم حاجة في رأيي احنا محتاجينها دلوقتي إن ماحدّش يسيب حقه..كل واحد في أي مكان يتمسّك دايماً بحقه.
ياريت أنتي ومها وأي حد مقتنع بفكرة الصيام يحط تنويه صغيّر عنده في البلوج ويقول لزمايله وأصحابه على الفكرة.
..
يوتّا..
بلاش نظام الناس، أنا مقتنع إن معظم الخراب والتدمير حصل من ناس تبع الحكومة، وحتى الحاجات اللّي حصلت من المواطنين فأكيد اللّي عملوها فئة صغيّرة من الناس.
بعدين مش من حقّنا نحاكم الناس اللّي الظروف المعيشية الوسخة طحنتهم.

مصطفى اسماعيل said...

فى فلم عسكر فى المعسكر كان بيقول ماجد الكدوانى وهو بيجري من ضرب النار
ادعي عليهم ربنا يهد الجبل فوق دماغهم
-------
مع احترامى الدعوات دى بتب... اخر حاجة
هو احنا ليه بندخل ربنا فى كل حاجة
الدعاوى دى بتنشر روح الاتكال فى الناس
لأما نقول للناس انزلوا يوم الخميس اتظاهروا
او ناموا يوم الخميس
لكن صوموا يوم الخميس وادعوا على مبارك
دى مسخرة
ربنا شايل ايده من زمان يا جدعان
......
وعلى رأى فؤاد قاعود المرة دى
عنيا صارت مثل جذوة جمر
فى مثل هذا الأمر
ما ترمز التعويذة غير للعجز
لكن حاشيل خنجر ابويا العظيم
ويا اقتل السحر اللئيم
يا اغمد النصل الكريم فى القلب

JuSt_hUmAn said...

مصطفى..
ايه المشكلة لما ندعي عليهم وننزل المظاهرات برضو؟
أنا نزلت المظاهرة، وهصوم وهدعي عليهم برضو..مش شايف تعارض بصراحة.

ٍSOU said...

انا استغربت جدددا م اللى حصل فى المحلة و ماصدقتش الصور افتكرتها صور من غزة او فلسطين او العراق..مش مصر ابدا..اضايقت اووووووووى على اسراء عبد الفتاح و على كل اللى تقبض عليهم..ان شاء الله يطلعوا بالسلامة

فكرة الصيام دى فكرة كويسة و ان شاء الله ننفذها

El - Shandwely said...

ربنا يرحم الجميع
اللى بيحصل فى المحلة ده هو لطبيعة الاغلبية العايشين هناك ..معظمهم عمال .. يعنى اول الناس اللى بيتاثرو بالعثرات الاقتصادية اللى بتحصل ..اللى مضايقنىفى الموضوع هو الجدل الحاصل مابين هل العمال هما اللى بيحرقو ويولعو ..ولا دول بلطجية متاجرين ..ولا دول تبع الحكومة
وتبقى كل هم اللى بيناقشو الموضوع ان كل واحد يحاول بكل مااوتى من قوه انه يترجم اللى حصل بحيث ان الفئة اللى مستهدفها تطلع الغلطانه سواء معارضة عايز يبين باى شكل ان دول بلطجية تبع الحومة ..او واحد تبع الحزب الوطنى كل همه انه يرسم صورة سيئة بان شوفو الاضرابات بتعمل ايه
................................

El - Shandwely said...

وفى الاخر يسيبوا النقطة الرئيسية اللى المفروض يناقشوها ..هل فى واقعنا شىء يستدعى ان حد يكون عنده الغضب ده ..وبدل ماندور مين اللى عمل كده المفروض ندور هو ليه عمل اصلا كده

YOTTA said...

متفقة ان فيه جزء من التدمير والخراب اللى حصل كان من الامن او ناس محرضين من الحكومة ..لكن برضو فيه ناس من اهل البلد انضمو ليهم..يعنى زى ماتقول كانو مستنيين حد يزقهم. ا

بعدين انا ماحاكمتش حد، لكن لو كانو اللى حرقو وكسرو دول مواطنين عاديين وعملو كده باسم الاضراب فهل ده من حقهم.. ده حل يعنى..اننا ننزل نكسر ونولع ف المدارس والمحلات..

وهل الفقر وظروف المعيشة الطاحنة تخلينا نبرر اللى حصل
!
لو كده يبقى كل ما تحصل جريمة او اعمال شغب ف مكان نقول معلش اصلهم فقرا وظروف المعيشة طاحناهم
.
انا مش متحاملة عليهم كأشخاص لان يمكن الظروف اللى انا عايشة فيها ويمكن كلنا مش احسن بكتير..لكن فى امور معينه بيبقى افضل نحكم العقل فيها.. والعقل بيقول ان اللى حصل ده همجية وفوضى ، حتى وان افضت الى شئ فالخسارة هتكون اكبر بكتير.

كنت برضو عايزة اقول الكلمتين اللى قالهم
cinema way
اللى حصل اهم من مين اللى عمل
واللى حصل مايرضيش ربنا
.

JuSt_hUmAn said...

Sou..
والله معاكي حق، الصور ولا كإنّها في فلسطين!
..
Cinemaway..
مش يمكن عشان النقطة الرئيسية دي بديهية؟!
بغض النظر عن الفساد الفظيع اللّي في الحكومة والنظام كله،الإضراب كان عشان غلاء الأسعار الفظيع، والمرتّبات الهزيلة بتاعة العمّال..الناس هتتبهدل أكتر من ايه!
..
يوتّا..
أي فوضة بتحصل أياً كان سببها بيدخل فيها كتير من الهمجيين و بيحصل فيها تجاوزات، دا شيء طبيعي يعني، ولو نفتكر اللّي حصل وقت الثورة الفرنسية مثلاً هنلاقي أفظع من دا بكتير.
المشكلة إن البعض بيحاول يوصّل إن الإضرابات والمظاهرات بيعملوا كدا وكدا وحش، يبقى الإضرابات والمظاهرات وحشة وكخّة ونقعد حلوين أحسن!
طبيعي تحصل تجاوزات في أي فوضى، لكن الحل مش إننا نقول يبقى نقعد حلوين بقى زي ما الحكومة عاوزة..المفروض نحاول نوعّي الناس أكتر.

مُزمُز said...

أنا رأيي فعلا نسيبنا من موضوع الدعاء والصيام ده لأنه حل العاجزين
انت مثلا نبهت لأن بعض السلفيين يمكن يقولوا حرام ندعي على ولي الأمر
أقوللك أنا يمكن كمان ناس يختلفوا على صيغة الدعاء والموضوع يبقى اتسفه وبااااظ جدا
وبعدين ندعي نقول إيه أصلا دي حاجة عبثية جدا ماهم الأئمة المبجلين بيدعوا على اليهود والأمريكان كل صلاة جمعة وبيطحنوهم دعا بس مفيش عاصفة نزلت خدتهم ولا حاجة ولا ده هيحصل
ربنا مش هيساعد الناس لما يدعوه ربنا ممكن يساعدهم لو عملوا حاجة إيجابية
والمشكلة لحسن في ناس ممكن تفتكر هو ده المطلوب منهم يصوموا ويدعوا وما اسهل ذلك وأبرده على قلوب ناس كسلانة في الأساس
وبعدين لو أنا مش مسلم أعمل إيه طيب أقصي نفسي عن الاضراب من سكات وللا إيه؟
رأيي نشيل كل الألبسة الدينية دي عن الموضوع أحسن
والمؤمنين اللي حابين يطلبوا مساعدة من ربنا يطلبوها مع نفسهم الموضوع مهواش حملة إيمانية منظمة
كفاية إن الإخوان ريحونا وبعدوا نفسهم من سكات
.....
أنا مكنتش عايز أول تعليق ليا عندك يكون مختلف معاك كده بس يللا بقى سنة الحياة

:)

JuSt_hUmAn said...

معاذ..
الأول سعيد بمرورك وتعليقك الأول
تاني حاجة بقى أعتقد إني وضحت وجهة نظري فما عنديش حاجة أضيفها غير إن مجرد إن الناس كلها تتشارك في شيء ضد الحكومة دا كخطوة أولى شيء كويس.