ملعون أبو الشتا!
ملعون أبو الشتا
ملعون أبو المطر
ملعون أبو دا شجر
ملعون أبو فرع أخضر
بقى خالي م الورق
..
ملعون أبو البرود
من غير حنان يدفّي
ملعون أبو المطر
إذا كانش جاي يروي
ملعون أبو ضي أزرق
بيرعش في السما
عمره ما يقدر ينوّر
ليل عتمتي أنا!
..
ملعون أبو قهوة سادة
في قهوة جنبنا
بقعد وحيد أشربها
وحبيبتي مش هنا!
..
ملعون أبو الشوارع
خالية من البشر
مفيهاش ولا حضن واحد
يحميني في السهر
..
ملعون أبو الضباب
مانعني منّها
ملعون أبو القمر
بيحجب وشّها!
..
ملعون أبو الشتا
وحبيبتي مش هنا!
عمرو النحراوي
20/11/2007!
20/11/2007!
6 comments:
كلامك المرادى ما عجبنيش يا عمرو.. عشان اللعن حرام.. اللعن ده معناه الطرد من رحمه ربنا.. وانت عبد من عباد ربنا يبقا ازاى تملك انت تطرد اى مخلوق من رحمته
ثانيا.. بالنسبه لصوره الشجره الصوره حلوه بس كانت هتبقا اجمل لو ساعه الغروب وماكنش السور اللى تحت ده يطلع فى الكادر
اتمنى ان كلامى ما يزعجكش.. او اكون اتعديت حدودى.. ده مجرد نصيحه بالنسبه للعن.. ورأى بالنسبه للشجره
ليه بس
الشتا فصل م فصول ربنا فعلا
اينعم هو بيحتاجنا نلبس بزياده
وبنتعب بزياده
والكل بيقعد ف بيتهم بزياده
وبيكون ف خمول بزياده
بس الحمدلله ع كل شىء
بيتهيألى الشتا السنه دى بالذات مايتقالوش غير كده..لحظات الدفا كانت قليلة أوى..لكنه الحمد لله مر..ا
بافكر من دلوقتى هايكون عامل ازاى السنه الجاية
!!
نسيت اقول ان الصورتين عاجبيننى جدااااً
.
انا ماقدرش ألعن الشتا(بغض النظر عن فكرة اللعن في حد ذاتها عشان أنا ما عنديش مشكلة بلعن حاجات كتيرة عادي يعني)بس الشتا بالذات ما بقدرش العنه مهما كان بارد ووحيد أو قاسي
الصور حلوة أوي
عندي بس ملحوظة صغنتوتة
انت قلت:
اذا كانش مش هيروي
يعني نفيت النفي
يعني لما نفصصها كدة هنلاقيها
انه مش مش هيروي،ونفي النفي معناه الاثبات ،يعني لو هو مش مش هيروي باتنين مش،فده معناه انه هيروي
وبكدة المعني مش مستقيم في سياق النص
مش عارفة انت ما اخدتش بالك عشان الوزن ولا ايه؟
..تحياتي
عمرو..
"ملعون" هنا تفيد الدعاء أو التمنّي..دا غير إن كل الحاجات الموجودة في القصيدة مش حاجات قابلة لللعن أصلاً!
مين هوّ أبو الشتا مثلاً؟!
بالنسبة للصورة فلو وقت الغروب هتدّي إحساس مختلف..بس عموماً أنا عمري ما رحتي شبين غير بالليل فأوبشن تصوير الشجرة وقت الغروب مش متاح بالنسبالي.
أما الرصيف-دا رصيف مش سور- فأنا فاكر إن كان فيه عواميد نور كتير كانت بتبوّظ الصورة عشان كدا لقطنا الصورة كتير بزواية مختلفة لحد ما طلعت هنا معقولة..اضطرينا ناخد الرصيف يعني عشان الضوء بتاع كشّافات النور.
بس عموماً معاك حق المفروض الرصيف دا يتقص.
سعيد بمرورك يا عمرو و ما تقلقش خد راحتك في أي تعليق : )
..
د/أجدع بنوتة..
من سنتين كتبت حاجة نثرية أتغزّل بيها في الشتا..الشتا في رأيي أجمل فصول السنة..لكنّي ما بقيتش بقدر عليه.
عموماً الهدف في القصيدة مش لعن الشتا..المعنى كله في أخر بيتين.
سعيد بمتابعتك.
..
يوتّا..
و الله ما عارف هل الشتا السنة دي وحش ولّا أنا اللّي مستوحشه..عموماً مبسوط إن الصورتين عجبوكي.
..
كاميليا..
بالنسبة للبيت أنا واخد بالي منه فعلاً لكن أنا أذكر أحمد خالد توفيق في تعليقه فمرة على التعبيرات الأجنبي اللّي من نوعيّة
I didn't see nobody
(بينفوا النفي بغرض تأكيد الإثبات مش النفي)
قال إن الموضوع مش غريب لأننا بنعمله لمّا بنقول "ما شفتش ولا واحد" و بيبقى الغرض تأكيد الإثبات برضو مش النفي.
عموماً هغيّرها لأن واضح إن كل الناس مش مستسيغين التعبير..كذا واحد من صحابي و كذا واحد في منتدى تاني علّقوا على الموضوع دا.
مبسوط بمرورك يا كاميليا.
Post a Comment