Saturday, July 05, 2008

تاج

الكمبيوتر اتصلّح الحمد لله، فقلت أرد على التاج دا الأول، التاج جالي من عمرو عبد الصمد
..
هواياتي
والله دلوقتي ما بمارسش أي هواية خالص غير القراية، مافيش وقت ومافيش نفس.

عيوبي
عصبي جداً، دماغي ناشفة، بفقد حماسي بسرعة، بشيل جوايا وصعب أنسى الإساءات.

حاجات بكرهها جداً
هممم، لو قعدت أعد مش هخلص، بس ممكن أقول التمسّك بالعادات والتقاليد المتخلفة، الخضوع وعدم الثورة (الثورة بشكل عام، ما أقصدش ثورة ضد نظام سياسي بالتحديد)، التظاهر والادّعاء والنفاق.
حاجات بحبها قوي ومش بمل من تكرارها
أنا ملول جداً بطبعي فعادي إني أزهق من أي حاجة، بس ممكن أقول معظم أفلام آلبتشينو، ومعظم أفلام عاطف الطيب، وشعر نجيب سرور، ومعظم أعداد سلسلة سافاري بتاعة أحمد خالد توفيق.
سؤال بيستفزني
أنت سايب دقنك ليه؟

حاجات مؤمن بيها جداً
مش فاهم السؤال دا بالظبط، كوتس مثلاً؟ طيب لو كدا فيه عبارتين، الأولى لجيفارا وبتقول:
It's a sad thing not to have friends, but it's even sadder not to have enemies
والتانية لسارتر وبتقول:
Hell is other people
أكتر حاجة فاشل فيها
فاشل إني أحقق السعادة لنفسي!
وظيفة بحبها
أنا ما بحبش الشغل بشكل عام، ولو جمّعت فلوس تكفّيني لحد ما أموت مش هشتغل أصلاً
بس ممكن أقول راعي غنم، أو صيّاد، أو فلّاح ( من غير ترتيب)
مثلي الاعلي في الحياة
ماليش!
أنا ضد فكرة المثل الأعلى أصلاً، لأنك بتحط حاجة قدامك وبتحاول توصل لها..طيب أولاً لو المثل الأعلى دا ارتكب خطأ معيّن هل يبقى من حقي أرتكب نفس الخطأ دا؟
دا غير إنك بتحط المثل دا كإنه الكمال اللّي بتحاول الوصول إليه، ليه بتحط سقف لنفسك؟
ما تحط الكمال نفسه وتحاول توصل إليه!
يعني أسيب الصدق مثلاً وأتخذ واحد صادق مثل أعلى في الصدق؟
طيب ما أنت قدامك المعنى المجرد!
للأمانة فيه نقطة سقّطتها عشان مش عاوز أجاوب عليها (أمنيتي في الحياة)، وبمرر التاج لأمادو ، ومؤنس فرحان
لو التاج ما يضايقهمش

8 comments:

amraction said...

عمووووووووور بذات نفسيته دخل عندى وجاوب ع التاج.. لا لا.. اكيد انا بحلم
متشكرين يا عمرو ع الزياره.. نورت البلوج... اجاباتك حلوه..بس معجبنيش موضوع المثل الاعلى..
عموما دى اراء شخصيه طبعا
ما تغليهاش اخر زياره بقا

بيقولوا سايكو said...

على العكس من عمرو الىل علق قبلى .. عجبنى موضوع المثل الأعلى و اغربته منك لإنى كنت متوقعة إن ليك مثل أعلى مش عارفة جبت الفكرة دى منين بس اهى كانت عندى ... بس بما إنك قلت كده فبكل فخر باقولك برافو عليك :)

yasmine said...

اجاباتك حلوة اوى الواحد اكتشف انه كان المفروض يجاوب زيك فى كذا سؤال
فعلا الواحد اكتر حاجة فاشل فيها هى انه يسعد نفسه
انا مكنتش اعرف ان كل الناس كده اكتر سؤال بيستفزها بيبقي عن الشكل كنت بحسب انا بس والله سعيدة باكتشافى ده
عجبنى برضه فكرتك عن المثل الاعلى

مُزمُز said...

انت جامد بشكل جامد اوي
:)

اختصار ف الاجابات ريحني من معظم الملل والرغي اللي اي حد بيعمله لما بتجيلوا الفرصة المقدسة يحل التاج

زائد اني طبعاااااا م هاقوللك قد ايه متق مع رايك ف موضوع الشغل ده

يا نهار ابيض

أنا ما بحبش الشغل بشكل عام، ولو جمّعت فلوس تكفّيني لحد ما أموت مش هشتغل أصلاً

يا راجل ده كانك بتتكلم عني فعليا

مؤنس فرحان said...

عمروو

شكرا عالتاج .. حجاوب عليه فى اسرع وقت
معلش انا ليا فترة دخولى بقى قليل عشان ظروف الشغل
...........
بالنسبة لإجاباتك عليه فهى بتقربنا منك أكتر ودا الهدف فى رأيى من أى مدونة انها تعرف صاحبها بنفسه قبل الناس لاننا لما بنراجع كلامنا واراءنا كل فترة بنعرف احنا بنتغير ازاى وبنتطور ازاى وكنا فين ورايحين لـ فين

شكرا على تمريرك التاج ليا

ســـــــمــــكة said...

تاح جميل وشخصيتك جميلة
:)

JuSt_hUmAn said...

عمرو..
يا عم عمرو بذات نفسيّته مرمّي عادي:d
ربنا يخليك يا ريّس.
..
آيات..
ممكن الفكرة دي جت فدماغك عشان اتكلمت عن جيفارا ونجيب سرور؟
عموماً فيه ناس كتير بحبها قوي وبحترمها قوي بس ماحدش كامل يعني، فلمّا أسعى للكمال هسعى للكمال نفسه.
..
ياسمين..
لسّه واحد صاحبي كان بيناقشني من يومين على الماسنجر في إجابة السؤال بتاع الفشل دي، بالنسبة لموضوع السؤال اللّي بيستفزّني فالفكرة إن غير هيافة السؤال، فالناس بتسأله كإن الديفولت إنك تحلق دقنك مادمت مش سايبها سُنّة!
سعيد بزيارتك يا ياسمين : )
..
معاذ..
ربنا يكرمك يا رب، وبجد مبسوط قوي إني لقيت حد زيّي في موضوع الشغل دا، عشان صحابي صدّعوني بالكلام بتاع قيمة العمل والليلة دي:d
بالمناسبة بقى أنا بحب اسم معاذ جداااا
..
مؤنس..
ربنا يعينك يا مؤنس، حاول بس تطمنّنا عليك من حين لآخر : )
..
سمكة..
ربنا يكرمك يا رب، وبما أن التاج عجبك فأنا بمررهولك.

Don't Say Aword said...

الحاجات اللى بكرها النفاق ازاى تسلم على انسان و تبتسم لية وانتة بتكرهة ازاى و لية ؟ اكيد عشان محتاج لة واو ليك عندة حاجة حصلت معايا كتير